Тошкент метросида тушириб қолдирилган 10 минг доллар пулни йўловчи топиб олган. “Тошкент метрополитени” ахборот хизмати ҳолат видеосини эълон қилди.
Лавҳада кўринишича, йўловчилар қаторида келаётган эркакнинг ён сумкасидан пул тушиб қолган. Эркак буни сезмаган ҳолда йўлини давом этган. Пул маълум муддат ерда ётган ва унга ҳеч ким эътибор қаратмаган.
Бироздан сўнг йўловчи аёл келиб пулни олган ҳамда бекатда хизмат фаолиятини олиб бораётган Метрополитенда хавфсизликни таъминлаш бошқармаси ходимларига топширган.
“Тошкент метрополитени” АЖ ҳалоллик, виждонлилик ва юксак фуқаролик масъулиятини намоён этган фуқарога, шунингдек, мазкур жараёнда фаол иштирок этиб, ўз хизмат вазифаларини виждонан бажарган МХТБ ходимларига самимий миннатдорлик билдиради”, дейилади хабарда.
Аввалроқ Ички ишлар вазирлиги мазкур ҳолат бўйича лавҳа эълон қилганди. Унда пулни йўловчи эмас, ички ишлар ходими топиб олгани айтилган.
Вазирлик лавҳасида келтирилишича, машина сотиб олиш учун Сергели туманига борган Қозоғистон фуқароси 10 минг доллар пулини йўқотиб қўйган. Уни Тошкент метрополитенида хизмат қилаётган ички ишлар ходимлари топиб олган.
Ўтказилган зарур текширув ва аниқлаш ишларидан сўнг пул маблағларининг қонуний эгаси аниқланиб, 10 минг АҚШ доллари белгиланган тартибда ўз эгасига тўлиқ қайтариб берилган.
“Олмазор метро бекатидан Сергелига келдим, шу пайт сумкамдан 10 минг долларим тушиб қолибди. Шошиб югуриб кетгандим. Метро ходимларига раҳмат, ички ишлар ходимлари пулни топиб, мени Face-ID'дан қидиришибди. Мен у пулни йўқотганимни машина бозорда билдим. Ҳалол экан, қайтиб келди. Ички ишларга мингдан минг раҳмат”, – деган ўзбек тилида гапирган қозоғистонлик.
Ички ишлар вазирлиги матбуот котиби Шохроҳ Ғиёсовнинг Kun.uz’га маълум қилишича, лавҳадаги “топиб олди” жумласи мажозий.
“Бу ерда “топиб олди” жумласи мажозий маънода келтирилган. Транспорт объектларида топилмалар хонасига келиб тушган ҳар қандай буюм эгасига қайтарилади”, дейди у.
Шохруҳ Ғиёсовнинг қўшимча қилишича, йил бошидан бугунгача 580 дан ошиқ ҳолатда фуқаролар метро, поезд ва самолётда моддий қийматликлари йўқолгани бўйича мурожаат қилган. Уларнинг барчаси топилиб, эгасига қайтарилган.
