Bank of Georgiaʼга эгалик қилувчи Lion Finance Group Ўзбекистон банк бозорига маҳаллий етакчи банклардан бирини сотиб олиш орқали кириши мумкин. Бу ҳақда компания бош директори Арчил Гачечиладзе Bloomberg нашрига берган интервюсида маълум қилди.
Гачечиладзенинг таъкидлашича, айни пайтда Bank of Georgiaʼнинг рақамли моделини янги бозорларга олиб чиқиш устида ишланяпти. Бунда биринчи навбатда йирик банкларга эътибор қаратилади. Хусусан, компания учун бозорнинг биринчи учлигидаги банклар афзал вариант ҳисобланади.
«Биз топ учлик ёки бешликка кирувчи ўйинчиларга эътибор қаратмоқдамиз», деган Гачечиладзе.
Lion Finance Group бош директори компания Ўзбекистондаги айни қайси банкни сотиб олиш устида ишланаётгани ва музокара жараёнлари ҳақида қўшимча маълумот бермаган.
Маълумот учун, айни пайтда Ўзбекистондаги активлари бўйича энг йирик бешта давлат банки қаторига «Миллий банк», «Агробанк», «Ўзсаноатқурилишбанк», «Асакабанк» ва «Халқ банки» киради. Бунда «Ўзсаноатқурилишбанк»ни хусусийлаштиришнинг якуний босқичи 2025−2026 йилларга, «Асакабанк», «Алоқабанк» ва «Туронбанк»ники эса 2026−2027 йилларга мўлжалланяпти. «Миллий банк», «Агробанк» ҳамда «Халқ банки»даги давлат улушини сотиш режалари эълон қилинмаган.
