Ҳукуматнинг «Ўзбекистон Республикасида экскурсия хизматларини янада такомиллаштириш чора-тадбирлари тўғрисида»ги қарори (468-сон, 2026 йил 4 сентябр) қабул қилинди.
Қарорга мувофиқ, 2026 йил 1 декабрдан Туризм қўмитаси ҳузуридаги Туризмни ривожлантириш илмий-тадқиқот институтига гидлар ва гид-таржимонларга уларнинг хоҳишига кўра малака тоифаларини бериш ваколати юклатилади.
Қарор билан «Гидларга (гид-таржимонларга) малака тоифасини бериш тартиби тўғрисида»ги низом ҳам тасдиқланди.
Унга кўра, гидларга ҳаваскор, ихтисослашган, профессионал ҳамда «олтин фонд» гиди малака тоифалари берилиши мумкин.
Бунда малака тоифасини олиш ихтиёрий ҳисобланади. Яъни гидда ушбу тоифалардан бирининг мавжуд эмаслиги унинг қонунчиликда белгиланган тартибда олинган малака сертификати асосида фаолият юритиш ҳуқуқини чекламайди.
Тоифа қандай берилади?
Гидга малака тоифасини беришда унинг касбий билим ва амалий кўникмалари, экскурсия хизматларини ташкил этиш ва ўтказиш маҳорати ҳамда экскурсия объектлари ҳақидаги билим даражаси ҳисобга олинади.
Шунингдек, туристлар билан мулоқот маданияти, хорижий тилларни билиш даражаси ва касб этикаси қоидаларига риоя қилиши ҳам баҳоланади.
Талабгорлар малака тоифасини олиш учун касбий имтиҳон топширади.
Имтиҳон натижаси 56 фоиздан 70 фоизгача бўлганларга ҳаваскор гид, 70 фоиздан 85 фоизгача натижа кўрсатганларга ихтисослашган гид, 86 фоиздан 100 фоизгача натижа қайд этганларга эса профессионал гид малака тоифаси берилади.
Малака сертификати чекланмаган муддатга расмийлаштирилади. Бироқ гид сифатида сўнгги икки йил давомида фаолият юритмаган шахс малака имтиҳонини қайта топшириши талаб этилади.
