Ўтган кун давомида жаҳонда рўй берган энг асосий воқеа ва янгиликлар шарҳи билан кундалик хабарномада таништирамиз. Яқин Шарқда АҚШ ва Эрон ўртасидаги қарама-қаршилик янада кескинлашди, ҳусийчилар Саудия Арабистони жануби бўйлаб ҳужум уюштирди. Норвегия эса қирол Ҳаралд V билан видолашмоқда.
Путин ва Трамп қўнғироқлашди
Россия президенти Владимир Путин ва АҚШ президенти Доналд Трамп 8 сентябр куни телефон орқали яна бир бор мулоқот қилди.
Кремл маълумотига кўра, суҳбатда Украина уруши ва Москва–Вашингтон муносабатларини тиклаш масалалари муҳокама қилинган.
Трамп урушни имкон қадар тезроқ якунлашни исташини айтган. У уруш якунланиши Россия ва АҚШ ўртасида савдо-иқтисодий алоқаларни қайта тиклаш учун катта имкониятлар очиши мумкинлигини қайд этган.
Путин эса Россиянинг Европа давлатларига нисбатан «душманона режалари йўқлиги»ни таъкидлаган. Томонлар асирлар алмашинувини давом эттириш ва алоқани сақлаб туришга келишиб олган.
Шу билан бирга, АҚШ элчиларининг Москва ва Киевга ташрифи муносабати билан эълон қилинган вақтинчалик сулҳ тугаб, Россия ҳарбийлари Украина бўйлаб ҳаво зарбалари йўллашни давом эттирмоқда. Хусусан, Киевда сўнгги портлашлар оқибатида беш киши ҳалок бўлиб, 20 дан ортиқ киши яраланган.
Саудияга ҳужум
Эрон томонидан қўллаб-қувватланаётган Яман ҳусийчилари Саудия Арабистони жанубидаги қатор шаҳарлар ва энергетика объектларига ракета ва дрон ҳужумларини амалга оширди.
Абҳа, Жизон, Нажрон ва Хамис-Мушайт шаҳарлари зарба остида қолган. Саудия расмийларига кўра, ҳужум оқибатида камида 73 киши жароҳатланган. Айрим нефт объектлари ва инфратузилма иншоотларида ёнғин чиққан. Жизондаги кунига 400 минг баррелгача нефт қайта ишлай оладиган завод ҳужум нишонларидан бири бўлган.
Бу воқеалар ортидан жаҳон нефт бозорида нархлар кескин кўтарилди. 9 сентябр тонгида Brent нефти нархи 99,49 долларгача чиқди – бу июн ойи охиридан бери энг юқори кўрсаткич. АҚШнинг WTI нефти эса 94,63 долларгача қимматлашди.
Эрон танкерларига ҳужум
Яқин Шарқда АҚШ ва Эрон ўртасидаги тўқнашувлар давом этмоқда. АҚШ ҳарбийлари Эронга тегишли 5 та нефт танкерига зарба берилганини маълум қилди.
