Варшавада ўтказилган танловда компания GPS сигналисиз ҳам ҳаракатлана оладиган ва кучли радиоэлектрон кураш шароитида иш қобилиятини сақлаб қоладиган автоном зарба платформалари оиласини тақдим этган.
Танлов олдига қўйилган вазифа оддий авиабаза ёки учиш-қўниш йўлагини бир марта нишонга олишдан кўра мураккаброқ эди. НАТО душман аэродромига шунчаки зарар етказиш эмас, балки унинг фаолиятини узоқ муддатга фалаж қилиб қўя оладиган арзон ва кенг кўламда қўлланадиган тизимларни излаган.
Сабаби, учиш-қўниш йўлаклари нисбатан тез таъмирланиши мумкин. Самолётларни бошқа майдонларга тарқатиб юбориш, ёқилғи ва ўқ-дори захираларини кўчириш ҳам мумкин. Шунинг учун битта зарба авиабаза фаолиятини фақат қисқа муддатга тўхтатиши эҳтимол.
НАТО танловида эса аэродромнинг бир вақтнинг ўзида бир нечта муҳим бўғини — учиш-қўниш йўлаклари, ёқилғи объектлари, таъмирлаш инфратузилмаси, ўқ-дори омборлари, ҳаво мудофааси воситалари ва бошқа элементларни қайта-қайта издан чиқарадиган комплекс ечим талаб қилинган.
Narwhal қандай ракета?
Ғолиб лойиҳанинг энг муҳим элементларидан бири — Narwhal. Манбага кўра, у Чехияда ишлаб чиқилган илк қанотли ракета бўлиб, яқинда синовларни якунлаган.
Ердан учириладиган ракета узунлиги тахминан 4 метр. У Чехияда ишлаб чиқарилган реактив двигатель билан жиҳозланган ва паст баландликда соатига тахминан 750 километр тезликда ҳаракатлана олади.
Компания Narwhalʼнинг жанговар юк ва парвоз масофаси билан фарқланувчи бир нечта турини ишлаб чиққан.
Асосий вариант 120 килограммгача портловчи моддани 680 километргача олиб бориши мумкин. Енгиллаштирилган, 40 килограммлик жанговар юкка эга вариантда эса парвоз масофаси тахминан 730 километргача ошади.
GPSсиз ҳам ҳаракатлана олади
Narwhalʼнинг НАТО танлови учун энг муҳим хусусиятларидан бири унинг навигация тизими ҳисобланади.
Ракета визуал навигация ва ер релефини кузатиб бориш технологиясидан фойдаланади. Бу унга доимий GPS сигналига боғлиқ бўлмасдан парвоз қилиш имконини беради.
Шу тариқа, GPS сигналлари тўсиб қўйилган ёки сохталаштирилган кучли радиоэлектрон кураш шароитида ҳам ракета вазифасини бажариш имкониятини сақлаб қолиши кўзда тутилган.
