Телевидение соҳасидаги нуфузли «Эмми» мукофоти ғолиблари 15 сентябрга ўтар кечаси Лос-Анжелесда эълон қилинди.
Американинг HBO Max платформаси томонидан тақдим этилган «Питт касалхонаси» (The Pitt) тиббий сериали турли йўналишларда жами олтита «Эмми» мукофотини қўлга киритди. Жумладан, лойиҳа иккинчи йил кетма-кет «Энг яхши драматик сериал» номинациясида ғолиб бўлди.
Сериалда бош ролни ижро этган Ноа Уайли ҳам иккинчи йил кетма-кет драматик сериалдаги энг яхши эркак роли учун «Эмми»га сазовор бўлди. Эрнест Харден кичик эса энг яхши таклиф этилган актёр деб топилди.
«Питт касалхонаси» драматик сериал учун энг яхши актёрлар таркибини танлаш ва энг яхши пластик грим йўналишларида ҳам мукофот олди.
Драматик сериалдаги энг яхши аёл роли учун «Эмми» Pluribus («Кўплардан бири») сериалидаги роли учун америкалик актриса Рэй Сихорнга топширилди. Эллисон Жэнни эса «Дипломат» (The Diplomat) сериалидаги роли учун энг яхши иккинчи пландаги актриса деб топилди.
HBO Maxʼнинг ўрта ёшли инсонлар ўртасидаги муҳаббат учбурчаги ва унинг фожиали якунланиши ҳақида ҳикоя қилувчи DTF St. Louis сериали «Энг яхши мини-сериал» номинациясида ғолиб чиқди.
Мини-сериалдаги энг яхши эркак роли учун мукофот The Beast in Me лойиҳасидаги ижроси учун Мэттю Ризга насиб этди.
Widowʼs Bay эса йилнинг энг яхши комедия сериали деб топилди.
