Япониянинг Mitsuoka компанияси дизайни классик Chevrolet Corvette C1 услубида ишланган янги икки ўринли LA1 родстерини тайёрламоқда. Автомобил учун замонавий Mazda МХ-5 асос бўлиб хизмат қилади.
Mitsuoka LA1 расмий премьерасини 26 ноябрга белгилаган. Ҳозирча компания биринчи суратларни эълон қилиб, фақат бўлажак моделнинг дизайнини ошкор қилди.
Родстернинг олд қисми 1950-йиллардаги Corvette C1 моделини эслатади. Автомобил тўртта фара, катталаштирилган радиатор панжараси, капотдаги вентиляция тешиклари ва олд сплиттерга эга бўлди. Орқа қисми ҳам классик Америка родстери услубида ишланган: кузовнинг ён томонларида жойлашган чироқлар, кўп миқдорда хром ва винтаж бампер.
Японияда жорий Mazda МХ-5 ND мос равишда 132 ва 184 от кучига эга 1,5 ва 2 литрли тўрт цилиндрли двигателлар билан таклиф этилади. Иккала мотор ҳам олти поғонали механик ёки автоматик узатмалар қутиси ва орқа ғилдирак тортувчи тизим билан ишлаши мумкин. Янги моделнинг нархи ҳозирча маълум қилинмаган.
LA1 Mitsuoka компаниясининг МХ-5 асосида яратилган ва Corvette’дан илҳомланган иккинчи лойиҳаси бўлади. 2018 йилда компания Rock Star родстерини тақдим этган бўлиб, унинг дизайни МХ-5 ND платформасини Американинг Corvette C2 элементлари билан ўзида мужассам этганди. Янги LA1 эскизларини ҳам Rock Star устида ишлаган дизайнер Таканори Аоки яратган.
