Япониянинг Mitsubishi компанияси Outlander моделининг янги авлодини тайёрламоқда, авлодлар алмашинуви яна икки йилдан сўнг юз бериши мумкин — янги кроссовер премьераси 2028 йилда кутилмоқда, деб хабар берди Япониянинг Responce нашри компания баёнотига таяниб.
Янги Outlander ташқи кўринишига ўтган йили Mitsubishi томонидан намойиш этилган Elevance концептуал автомобили асос қилиб олинади. Ўлчамлари ва шакли бўйича концепт жорий Outlander моделига яқин бўлган, бироқ аввалроқ тақдим этилган Pajero руҳидаги тубдан янги дизайнга эга. Серияли ишлаб чиқаришга ўтиши мумкин бўлган асосий элементлар: кузовнинг олд қисми бўйлаб тушадиган кундузги юриш чироқларига эга ифодали бош оптика ҳамда кузов рангига бўялган радиатор панжараси.
Агар концептга асосланилса, орқа қисм яхлит светодиодли чизиқ ҳамда Д-симон устунлар бўйлаб кўтарилиб, кузовнинг орқа қисмини кесиб ўтадиган янги орқа чироқларга эга бўлади.
Жорий Outlander плагин-гибриди 2,4 литрли атмосфера двигатели, иккита электр мотори ва 22,7 кВт·соат сиғимли батарея билан жиҳозланган. Умумий қуввати — 297 от кучи ва 450 Н·м, соф электр энергиясида юриш захираси — 106 км гача.
Янги авлодда Mitsubishi яна иккита электр моторини қўшиши мумкин — жами тўртта. Бу нафақат қувватни оширади, балки Elevance концептида ҳам намойиш этилган кейинги авлод S-AWC (Super All-Wheel Control) тўлиқ узатмали тизимининг асосий элементига айланади. Тизим аниқроқ бошқариш ва юриш сифатини яхшилаш учун айланувчи лаҳзани ғилдираклар бўйлаб тақсимлайди.
