“Бувим энди кўрмайди...”
“80 ёшни қаршилаётган бувимнинг чап кўзи хиралашиб қолган эди. Вилоят марказидаги шифохонага олиб келсак, мутахассислар ҳолатни кўриб, кўзга сунъий гавҳар қўйиш кераклигини айтишди. Жарроҳлик йўли билан кўзга гавҳар қўйилди. Операциядан бир кун ўтиб бувимнинг аҳволи ёмонлаша бошлади. Кўзига тошмалар тошди, шиш ҳосил бўлиб, йиринг оқаверди. Операция қилган шифокор Ойбек Акбаралиевичга қўнғироқ қилиб, вазият ҳақида хабар бердик. У беморни зудлик билан шифохонага олиб келиш кераклигини айтди. Шундоқ ҳам азобланиб турган бувимни яна марказга олиб келдик.
Шифохонага бориб билдикки, 9-10 сентябр кунлари бувим билан бирга операция бўлган 14 нафар беморда ҳам худди шундай ҳолат юз берган экан.
Бувим ўша куни касалхонада қолди. Аҳволи оғирлашаверганидан биз операция қилган шифокор Ойбек Акбаралиевичнинг ёнига кирдик. У ваҳима қиладиган жойи йўқлигини, кўздаги шиш билан йиринг инфекция сабабли эканини, 10 кунларда кўз яна кўра бошлашини айтди.
14 сентябр куни микрохирургия бўлими бош шифокори Абдураззоқ Шерматов операция қилинган беморларни зудлик билан Тошкентга олиб бориш кераклигини маълум қилди. 15 сентябр куни эрта тонгда 14 нафар беморни Тошкентга олиб кетишди.
Учтепа туманидаги Республика ихтисослаштирилган кўз микрохирургияси илмий-амалий тиббиёт маркази шифокорлари вирус юққан кўзни ярим соат ичида олиб ташламаса, йиринг мияга ўтиб кетиб, барча беморлар ҳалок бўлиши мумкинлигини айтган экан. Ўша куни тушдан кейин отам пойтахтдан телефон қилиб, бувимнинг операция қилинган кўзини бутунлай олиб ташлашганини айтди. Хабарни эшитиб этимиз жимирлаб кетди.
Операцияни деб 9 бемор кўзидан айрилди, қолган 6 бемор ҳам кўзидан айрилса керак. Энг ачинарлиси, 15 нафар беморнинг ҳаммаси операцияга очиқ кўз билан кирган. Улар энди кўрга айланди.
Кўзи олиб ташланган 9 киши бундан кейин кўра олмасликларини ҳали билишмайди. Чунки операция таъсирида кўзингиз вақтинча кўрмай туради, бир ҳафтадан кейин яна кўриб кетасизлар, деб уларни алдаб турибмиз. Беморларнинг кўпида қанд касали, қон босими бор-да.
Кўзидан айрилган беморларнинг кўзини 3 нафар шифокор операция қилган. Уларга қатъий чора кўришларини талаб қиламиз”, дейди бувиси бир кўзидан айрилган Жалолиддин Маҳмудов.
Яна бир мурожаатчи Исроил Парпиев 70 ёшни қаршилаётган отасининг кўзига сунъий гавҳар қўйилганини, жарроҳлик амалиётидан сўнг инфекция юқиб, отаси икки кўзидан ҳам айрилганини маълум қилди.
“Кўзни олиб ташлашга мажбур бўлдик”
“Республика ихтисослаштирилган кўз микрохирургияси илмий-амалий тиббиёт марказининг Фарғона филиалида 9-10 сентябрь кунлари 15 нафар беморда катаракта ташхиси билан жарроҳлик амалиёти ўтказилгани рост. Жарроҳликдан сўнг беморларда яллиғланиш асорати кузатилиб, уларнинг 12 нафари Республика кўз микрохирургияси илмий-амалий тиббиёт марказига кўчирилди.
У ерда зарур тиббий ёрдам кўрсатилиб, витректомия амалиёти ўтказилди. Натижада тўрт нафар беморнинг кўз аъзоси сақлаб қолинди. Бироқ афсуски, тўққиз нафар беморда асоратларнинг олдини олиш мақсадида кўз соҳаси олиб ташланди. Ҳозирда беморларнинг умумий аҳволи барқарорлашган.
Операциялар уч нафар шифокор томонидан амалга оширилган. Олиб ташланган кўзлар ўрнига протезлар ўрнатилиб, косметик жиҳатдан тикланди.
Аҳволи яхшиланган беморларнинг бир қисмига уйга жавоб берилган бўлиб, улар назоратга олинган. Шунингдек, Фарғона филиалида ҳам даволанишни давом эттираётган беморлар бор.
Беморлар марказимизга кўз гавҳарининг хиралашиши (катаракта) шикояти билан мурожаат қилишган эди. Уларнинг ҳолатидан келиб чиқиб тегишли жарроҳлик амалиётлари ўтказилган.
Соғлиқни сақлаш вазирлигининг 2026 йил 22 сентябрдаги 402-сонли буйруғига асосан, марказимизга махсус мутахассислар гуруҳи ташриф буюрган. Ҳозирда ҳолат бўйича ўрганиш ишлари олиб борилмоқда. Инфекциянинг келиб чиқиш сабаблари ва вазият юзасидан якуний хулосалар ўрганиш якунлангач тақдим этилади”, — деди Кўз микрохирургияси илмий-амалий тиббиёт марказининг даволаш ишлари бўйича директор ўринбосари Шукурулло Асқаров.
Kun.uz ҳолатни кузатишда давом этади.
