DW хабарига кўра, Украина президентининг коммуникациялар бўйича маслаҳатчиси Дмитрий Литвин 25 сентябр куни «Украинская правда» нашрига берган изоҳида Bloomberg маълумотини «ҳақиқатга тўғри келмайдиган ахборот» деб атаган.
Bloomberg манбаларига кўра, Трамп бу таклифни Ню-Йоркда БМТ Бош Ассамблеяси сессияси доирасида Зеленский билан учрашув вақтида билдирган. Агентлик Украина президенти таклифни рад этганини ёзган. Зеленскийга яқин манбалар эса бу таклиф уни ранжитганини айтган.
Шу ҳафта Зеленский ва Россия ташқи ишлар вазири Сергей Лавров Ню-Йоркда Трамп маъмурияти вакиллари билан алоҳида учрашувлар ўтказган.
Bloomberg маълумотига кўра, жаҳонда дизел ёнилғиси нархлари ошаётган бир пайтда Вашингтон Москва ва Киевни энергетика объектларига ҳужумларни тўхтатиш бўйича келишувга эришишга ундаган.
Музокаралар БААда ўтказилиши мумкин
Зеленский 25 сентябр куни АҚШ, Украина ва Россия ўртасидаги техник форматдаги уч томонлама музокаралар Бирлашган Араб Амирликларида ўтказилиши мумкинлигини билдирган.
Айни пайтда, Кремл Киевнинг урушни тугатиш бўйича музокараларни Майамидаги G20 саммити вақтида ўтказиш ҳақидаги яқинда билдирган таклифини рад этган. Вашингтон ушбу саммитга Россия президенти Владимир Путинни ҳам таклиф қилган.
Россия томони Путин ва Зеленский учрашуви фақат Москвада ўтиши мумкинлигини бир неча бор таъкидлаган. 23 сентябр куни Россия президенти матбуот котиби Дмитрий Песков Зеленский «истаса, Москвага келиши мумкинлиги» ва унга «зарур хавфсизлик кафолатлари берилиши»ни айтган.
Июн ойида Путин Зеленский россиялик тадбиркорлардан бири орқали ундан шахсий учрашув сўраганини билдирган эди. Кейинчалик Украина президенти Кремл раҳбарига Роман Абрамович орқали мактуб йўллаганини маълум қилган.
