«Ёқилғи-энергетика тармоғини янада ривожлантириш чора-тадбирлари» тўғрисидаги президент фармони қабул қилинди. Фармонда газлашмаган ҳудудлар учун электр энергиясига имтиёзли тарифларни жорий қилиш вазифаси қўйилган.
Ҳужжатда табиий газ етиб бориши қийин бўлган ҳудудларни электрлаштириш учун халқаро молия институтлари билан музокаралар ўтказилиши кўзда тутилган. Шунингдек, халқаро молия институтларининг техник кўмагидан фойдаланган ҳолда тажрибали консултантларни жалб қилиш режалаштириляпти. Улар билан биргаликда табиий газ етиб бориши қийин бўлган ҳудудларни электрлаштириш консепсияси ишлаб чиқилади. 2027 йил февралгача:
— электрлаштириладиган истеъмолчилар, шунингдек, табиий газ таъминоти мавжуд бўлмаган ва иситиш мақсадида электр энергиясидан фойдаланиб келаётган истеъмолчилар учун электр энергиясининг имтиёзли тарифларини белгилаш;
— электрлаштириш натижасида алмаштириладиган энергия самарадорлиги юқори бўлган маиший техникаларни сотиб олишда қўллаб-қувватлаш механизмларини жорий этишдан иборат электрлаштириш концепцияси ишлаб чиқилиши керак.
Лойиҳа 2027 йил апрелгача ҳукуматга киритилиши кўзда тутилган. Мазкур йўналишдаги ишлар учун масъул ижрочилар сифатида Энергетика вазирлиги, Иқтисодиёт ва молия вазирлиги ҳамда Энергия самарадорлиги миллий агентлиги кўрсатилган.
Эслатиб ўтамиз, 2024 йилнинг октябр ойида собиқ энергетика вазири Жўрабек Мирзамаҳмудов газлаштирилмаган ҳовлилар учун ҳам электр энергия тарифларига 50 фоизлик чегирма бериш бўйича топшириқ бўлганини айтганди. Кейинчалик бу борада тегишли қарор лойиҳаси ишлаб чиқилгани ҳам маълум қилинганди. 2025 йилнинг октябр ойида эса ушбу ташаббус босқичма-босқич амалга оширилиши, айрим ҳудудларда пилот лойиҳа синовдан ўтказилиши хабар қилинганди.
