DW нашрининг Reuters агентлигига таяниб хабар беришича, Криста Пайкка нисбатан ўлим ҳукмини ижро этишга уриниш 30 сентябр оқшомида Нашвилл шаҳридаги Riverbend қаттиқ тартибли қамоқхонасида амалга оширилган.
Бироқ ўлимга олиб келиши керак бўлган инъекциядан кейин аёл тирик қолган. dpa агентлиги маълумотига кўра, унга заҳарли кимёвий моддалар билан икки марта инъекция қилинган.
Теннессида бу 200 йилдан ортиқ вақт ичида аёлга нисбатан ўлим ҳукмини ижро этишга қаратилган биринчи уриниш бўлган.
Қамоқхона маъмурияти баёнотида белгиланган ва тасдиқланган қатл тартибининг барча босқичларига амал қилингани таъкидланган. Расмийлар инъекция учун ишлатилган модда аввалги ҳолатларда доимо таъсир кўрсатганини билдирган.
Шу билан бирга, ўша куни ҳукмни ижро этиш доирасида қўшимча чоралар назарда тутилмагани қайд этилган. Пайкнинг тирик қолиш сабаби хабарда очиқланмаган.
Пайк нима учун ўлимга ҳукм қилинган?
1995 йилда 18 ёшли Криста Пайк ва унинг шериги Тадарил Шипп Пайк билан бирга ўқиган 19 ёшли Коллин Слеммерни ўлдирган.
Бир йил ўтиб, Пайк биринчи даражали қотилликда айбдор деб топилиб, ўлим жазосига ҳукм қилинган. Жиноят содир этилган пайтда 17 ёшда бўлган Шипп эса муддатидан илгари шартли озодликка чиқиш имконияти билан умрбод қамоқ жазосини олган.
Нашрга кўра, Пайк АҚШнинг замонавий тарихида ўлим жазосига ҳукм қилинган энг ёш аёл бўлган. Слеммернинг кўкрагида пентаграмма белгиси топилгани ишнинг мамлакат бўйлаб катта шов-шувга сабаб бўлишига олиб келган.
Адвокатлар афв сўраган
Пайкнинг ҳимоячилари жиноят содир этилган пайтда унинг атиги 18 ёшда бўлгани ва руҳий ҳолатини инобатга олиб, афв этишни сўраган.
Адвокатларнинг айтишича, у йиллар давомида онасининг турмуш ўртоқлари томонидан жинсий зўравонликка учраган, руҳий муаммолар ва биполяр бузилишдан азият чеккан.
Ҳимоя томони Пайкни ушлаб туриш ва қатл учун тиббий кушеткага боғлаш шароитлари Конституциядаги «шафқатсиз ва ғайриоддий жазо» тақиқига зид эканини ҳам билдирган.
