800 минг фуқаронинг 22 млрд сўмлик асоссиз коммунал қарзи қайта ҳисобланди. Куннинг муҳим янгиликлари билан таништирамиз.
Педофилия учун жазо кучайтирилди
Президент Шавкат Мирзиёев болаларга нисбатан зўравонлик жиноятлари учун жазони оғирлаштирувчи қонунни имзолади. Қонун билан 5 та кодекс ва 6 та қонунга ўзгартиришлар киритилди.
Бундан буён 14 ёшга тўлмаган болага нисбатан жинсий зўравонлик содир этган шахсларга 25 йилгача озодликдан маҳрум қилиш ёки умрбод қамоқ жазоси тайинланади. Бундай оғир жиноятлар бўйича жавобгарликка тортиш муддатида чеклов бўлмайди.
Шунингдек, жинсий зўравонликка оид жиноят ишлари бўйича вояга етмаган жабрланувчига давлат ҳисобидан юридик ёрдам кўрсатадиган адвокатнинг иштирок этишини таъминлаш чоралари кўрилади.
8 миллион долларлик фирибгарликда банкнинг киберхавфсизлик ходими ҳам қатнашгани маълум бўлди
Тошкентда банклар номидан қўнғироқ қилиб, фуқароларнинг пулларини ўзлаштириш ва уларнинг номига онлайн кредит расмийлаштириш билан шуғулланганликда гумонланаётган гуруҳ фаолиятига чек қўйилди. Хабарга кўра, гуруҳ таркибида банклардан бирининг бош офиси киберхавфсизлик бўлими ходими ҳам бўлган.
Маълум қилинишича, Тошкент шаҳри ва Тошкент вилоятида яшовчи, 1989–2005 йилларда туғилган беш нафар шахс Миробод туманидаги нотурар бинони ижарага олиб, сохта колл-марказ ташкил этган.
Тақдим этилган маълумотга кўра, жиноий йўл билан топилган жами 8 миллион АҚШ доллари криптовалюта кўринишида сохта корхона орқали хорижий давлатга чиқарилиб, легаллаштирилган. Ҳолат юзасидан жиноят иши қўзғатилган.
Бизнесни давлат томонидан рўйхатга олиш тартиби белгиланди
Ҳукумат қарори билан бизнесни рўйхатга олишни ўтказиш чора-тадбирлари тасдиқланди. Қарорга кўра, рўйхатга олиш 2026 йил 15 октябрдан 30 ноябрга қадар ўтказилади. Рўйхатга олиш санаси — 2026 йил 1 октябрь, соат 00:00.
