DW хабарига кўра, Киев мэри Виталий Кличко ҳужум оқибатлари ҳақида Telegram каналида маълум қилган. Дастлабки маълумотларда шаҳарга жами 10 та ракета, жумладан, «Искандер-М», «Циркон» ва С-400 учирилгани айтилган.
Днипровский туманида иккита хусусий уй ва автомобилларга техник хизмат кўрсатиш станцияси биносига зарба теккан. Шунингдек, ёнилғи қуйиш шохобчаси яқинига парчалар тушган.
Дарницкий туманида транспорт инфратузилмаси объекти шикастланган. Кличко объект ҳақида қўшимча тафсилот бермаган. Печерский туманида эса тиббиёт муассасасига зарар етган.
Ҳужумдан сўнг Киев шаҳар ҳарбий маъмурияти дронлар хавфи ҳам сақланаётганини билдириб, аҳолини бошпаналарда қолишга чақирган.
Киев сўнгги кунларда ҳам ракета ва дрон ҳужумларига учраган. 20 октябрдаги дрон ҳужумларида бир киши ҳалок бўлган, яна бир неча киши жароҳатланган. Николай Стражеско номидаги Кардиология институтининг операция хонаси ҳам шикастланиб, бир бемор яраланган.
Ўша куни энергетика объектига дрон келиб урилиши сабабли шаҳарнинг тўрт туманида электр таъминоти вақтинча узилган. Ундан олдинги тунда эса Киев яқинидаги дрон ҳужумларида олти киши ҳалок бўлгани хабар қилинган.
18 октябр оқшомидаги ракета ҳужумида 21 ёшли қиз ҳалок бўлган, камида беш киши жароҳатланган. Днипронинг чап соҳилидаги метро бекатларидан бири ҳам шикастланган эди.
