Ижтимоий тармоқларда Ўзбекистонда 1 млн сўмлик банкнота муомалага чиқарилгани ҳақида хабарлар тарқалди. Марказий банк бунга изоҳ берди.
«Мазкур маълумот асоссиз бўлиб, ёлғон ва фейк эканлигини маълум қиламиз. У ҳақиқатга тўғри келмайди», — дейилади регулятор хабарида.
Маълумот учун, «Марказий банк тўғрисида»ги қонунининг 39-моддасига асосан Ўзбекистонда пул белгиларининг номинал қиймати регулятор томонидан белгиланади.
Мазкур қонуннинг 40-моддасига мувофиқ, Марказий банк мамлакат ҳудудида қонуний тўлов воситаси сифатида банкнотлар ва тангалар кўринишидаги пул белгиларини муомалага чиқаришда мутлақ хуқуққа эга ҳисобланади. Янги пул белгиларини Сенат маъқулланганидан сўнг Марказий банк янги пул белгиси тавсифи ва унинг муомалага чиқарилиши тўғрисидаги маълумотларни оммавий ахборот воситаларида эълон қилади.
