Gulfstream Aerospace кўргазмада G400 дастурининг яна бир муҳим босқичи — салони тўлиқ жиҳозланган синов самолётининг биринчи парвози ҳақида ҳам маълум қилди.
Ушбу самолёт АҚШдаги Даллас-Лав-Филд аэродромидан ҳавога кўтарилган. Парвоз икки соат 46 дақиқа давом этган, аппарат 14,6 километр баландликка чиққан.
Синов самолёти салони 11 йўловчига мўлжалланган бўлиб, ички макон компания таърифига кўра, икки ярим зонага ажратилган. Парвоз давомида мутахассислар салондаги борт тизимларининг баландликда ишлашини, уларнинг функционаллиги ва йўловчилар учун қулайликни текширган.
Икки двигателли G400 бизнес-жетининг парвоз масофаси 7780 километрга мўлжалланган. Тўлиқ жиҳозланган самолётнинг ҳавога кўтарилиши сертификатлаш дастуридаги навбатдаги қадам бўлган.
Gulfstream Aerospace президенти Марк Бернс журналистлар билан учрашувда сертификат олишнинг аниқ муддатини айтмаган. Бироқ у дастур «жуда яхши илгарилаётганини» ва сертификатлашга хавф туғдириши мумкин бўлган муаммоларни кўрмаётганини билдирган.
G400 парвоз синовлари дастурига жами тўртта самолётни жалб қилиш кўзда тутилган. Майами — Лас-Вегас парвозидаги натижа эса айнан шу шаҳарлар ўртасидаги йўналиш рекорди сифатида эълон қилинган.
