Бу ҳақда «Независимая газета» Роспотребнадзор Марказий эпидемиология илмий-тадқиқот институти директори Василий Акимкин ҳамда «Медвестник» нашри маълумотларига таяниб хабар берди.
Эпидемиянинг генерализациялашган босқичи инфекция тарқалиши алоҳида юқори хавф гуруҳлари билан чекланмай, кенг аҳоли қатламларида ҳам кузатилишини англатади.
Институтнинг ОИТС профилактикаси ва унга қарши кураш бўлими етакчи илмий ходими Наталя Ладнаянинг маълум қилишича, янги ҳолатлар сони барқарор камаяётган бўлса-да, ОИВ инфекцияси билан боғлиқ умумий муаммо енгиллашаётгани йўқ.
Бир йилда 45 минг янги ҳолат
Келтирилган маълумотларга кўра, 2025 йилда Россияда 45 мингта янги ОИВ ҳолати аниқланган. Бу 2024 йилги кўрсаткичдан 13,4 фоиз кам.
Айни пайтда, «Независимая газета» ёзишича, Россиянинг 2027 йилги бюджет лойиҳасида дорилар учун ажратилиши кўзда тутилган қўшимча маблағлар ОИВ аниқланган яна 30 минг кишини қамраб олишга мўлжалланган.
Ладная Россияда ОИВ билан яшовчилар орасида йилига 30–34 минг ўлим қайд этилаётганини билдирган. «Медвестник» бу кўрсаткични ўта юқори деб баҳолаган.
Вирус юкламасини бостириш кўрсаткичи паст
Ладнаянинг маълумотига кўра, 2025 йил охирига келиб Россияда ОИВ билан яшовчиларнинг фақат ярмида вирус юкламаси бостирилган.
Даволанаётганлар орасида эса бу кўрсаткич 77,9 фоизни ташкил этган. Хабарда келтирилган халқаро мақсадли кўрсаткич — камида 95 фоиз.
Тиббиёт муассасаларида ҳам юқиш ҳолатлари қайд этилган
Роспотребнадзорнинг аҳоли эпидемиологик осойишталиги бошқармаси раҳбари Елена Игонина 2025 йилда тиббий ёрдам кўрсатиш вақтида ОИВ ва гепатит юқиши билан боғлиқ саккизта ўчоқ аниқланганини маълум қилган. Бу сўнгги 15 йилдаги энг юқори кўрсаткич экани айтилган.
Ушбу ўчоқларда жами 104 беморга инфекция юққан. Хабарда уларнинг қанчасида ОИВ, қанчасида гепатит аниқлангани алоҳида кўрсатилмаган.
Игонина бундай ҳолатларнинг асосий сабаби сифатида санитария-эпидемиология талаблари бузилишини келтирган. Жумладан, индивидуал фойдаланиш учун мўлжалланган катетерлар ёки қондаги қанд миқдорини ўлчайдиган глюкометрлар бир нечта беморда ишлатилгани қайд этилган.
