11:42 / 26.07.2016
11765

“O‘zbekiston havo yo‘llari” MAK hamda Rossiyaning S7 Airlines aviakompaniyasi kod-shering bitimini imzolashdi

“O‘zbekiston havo yo‘llari” MAK va Rossiyaning S7 Airlines aviakompaniyasi hamkorlikdagi reyslarni amalga oshirishni ko‘zda tutuvchi kod-shering bitimini imzolashdi. Bu haqida UzDaily xabar qildi

Rossiya aviakompaniyasining ma'lumotlariga ko‘ra, mazkur bitim Novosibirsk va Toshkent o‘rtasidagi parvozlar chastotasini oshirish imkonini beradi. Har haftaning yakshanba kunlarida S7 Airlines ikki shahar o‘rtasidagi reyslarini amalga oshiradi. Endilikda esa aviakompaniya jadvaliga yana ikkita reys qo‘shildi – bundan buyon dushanba va payshanba kunlari ham reyslar amalga oshiriladigan bo‘ldi. 

Bundan tashqari, Novosibirskdagi S7 Airlines yo‘lovchilari O‘zbekistonning aholi soniga ko‘ra uchinchi o‘rinda turuvchi Namangan shahriga to‘g‘ridan-to‘g‘ri reys orqali yo‘l olish imkoniyatiga ega bo‘lishadi. Parvozlar har dushanba kuni “O‘zbekiston havo yo‘llari” MAKning Airbus A320 samolyotida amalga oshiriladi. Novosibirskning Tolmachyovo aeroportidan uchish vaqti - 16:30, Namangan aeroportidan esa - mahalliy vaqt bilan soat 10:20da. 
  
S7 Airlines’ning boshqa shaharlardan keluvchi yo‘lovchilari Toshkent va Namanganga Novosibirsk aeroportidan yo‘l olishlari mumkin bo‘ladi. Bunday yo‘nalishga yagona aviachipta rasmiylashtiradi.

O‘z navbatida, “O‘zbekiston havo yo‘llari” MAK kodi S7 Airlines’ning Novosibirsk — Toshkent va Novosibirsk — Farg‘ona reyslarida paydo bo‘ladi. O‘zbekistonlik yo‘lovchilar nafaqat Novosibirskka uchib borishlari mumkin, balki Tolmachyovo aeroportida Rossiyaning boshqa shaharlariga hamda xorijiy shaharlarga ham yo‘l olishlari mumkin bo‘ladi.

Top