Kreml WADA'ga amalga oshirilgan kiberhujum borasidagi ayblovga nisbatan javob qaytardi

Kremlning rasmiy vakili Dmitriy Peskov Jahon aksildoping agentligining (WADA) ma'lumotlar bazasini rossiyalik xakerlar buzib kirganligiga doir ayblovga javob berdi. U dalillar keltirilmagan ayblovlar birorta tashkilotga obro‘ keltirmasligini ta'kidladi. Bu haqida RIA "Novosti" ma'lum qildi. 

"Shuni ta'kidlash joizki, rasmiy Moskva, hukumat yoki biror bir Rossiya idorasining bunday qilmishlarga aloqadorligi haqida gap ham bo‘lishi mumkin emas. Bu mutlaqo bo‘lmagan gap", - dedi Peskov. 

13 sentabrda Rossiyaning Fancy Bear xakerlar guruhi WADA amerikalik tennischilar Serena va Vinus Uilyamslarga taqiqlangan dori vositalarini davolash maqsadida iste'mol qilishga ruxsat berganligi to‘g‘risidagi ma'lumotni chop etgan. Shuningdek 2016 yili to‘rt karra olimpiada chempioniga aylangan amerikalik gimnastikachi Simona Baylzning "ijobiy" doping test topshirgani, lekin o‘yinlardan chetlashtirilmagani aniqlangan. 

WADA rossiyalik xakerlar guruhini ADAMS ma'lumotlar bazasiga noqonuniy buzib kirganlikda ayblamoqda.