«Qizilqumsement» sement zavodi bosh direktor lavozimiga tanlov e'lon qildi

O‘zbekistondagi eng yirik sement zavodlaridan bo‘lgan «Qizilqumsement» AJ bosh direktor lavozimiga tanlov e'lon qildi. Bu haqda nuz.uz sayti xabar bergan.

Aktsionerlik jamiyati saytida bosh direktor lavozimiga da'vogarlar uchun talablar o‘zbek, rus va ingliz tillarida keltirilgan.

Unga ko‘ra, da'vogar oliy kasbiy ta'lim darajasiga ega bo‘lishi, rahbar lavozimlarda kamida 3 yillik ish stajiga ega bo‘lishi lozim hisoblanadi.

Nomzodning xorijiy tillarni bilishi, korporativ boshqaruvning zamonaviy uslublari sohasida sertifikati mavjudligi qo‘llab-quvvatlanadi.

Nomzod qurilish materiallari ishlab chiqarish, iqtisodiyot, menejment va marketing sohalarida bilimlarga, korxonaning moliyaviy-xo‘jalik faoliyati tahlilini amalga oshirish qobiliyatiga ega bo‘lishi lozim.

Nomzodlar tomonidan hujjatlarni topshirish muddati shu yilning 20 oktabr, soat 18.00ga qadar etib belgilangan.

«Qizilqumsement» OAJ 1994 yili Navoiy sement kombinatini Ochiq turdagi aksionerlik jamiyatiga aylantirish yuli bilan tashkil qilingan. Ishlab chiqarish hajmi - yiliga 3 mln 430 ming tonna sement.

«Qizilqumsement» AJ tomonidan 10dan ortiq turdagi qurilish mahsulotlari (sement mahsulotlari, shifer, plitalar, devorbop bloklar, asbestosementli mahsulotlar, elektrodlar, sement qadoqlash qopchalari, beton va temir betonlar) ishlab chiqariladi.