IShID Iroqda dronlardan foydalana boshladi

Iroqda IShID jangarilarining portlovchi moddalar joylangan drondan foydalanishi oqibatida ikki nafar fransuz askari jiddiy jarohatlangan, deb xabar qiladi Reuters agentligi.

Bundan tashqari, kurdlarning «peshmerga» harbiy bo‘linmasining ikki a'zosi qurbon bo‘lgan. Fransiyaning Le Monde nashri yozishicha, hujum 2 oktabr kuni sodir etilgan.

Qayd etilishicha, harbiylar kichik dronni tutib olishgandan so‘ng, u portlab ketgan. Bunda portlovchi moslama masofadan ishga tushirilgani yoki taymer sabab portlagani noma'lum. 

Fransiya mudofaa vazirligi, Iroq armiyasi va «peshmerga» kurd bo‘linmalari bu borada izoh berishganicha yo‘q. 

Sentyabr oyida «Ahror ash-Shom» guruhi ham Suriyada portlovchi moslama o‘rnatilgan dronlardan foydalangan edi.