YeChL anonsi. Ye guruhi. Omadsiz «Uembli»dagi xayrlashuv uchrashuvi

Yevropa chempionlar ligasining guruh bosqichi so‘nggi tur uchrashuvlari chorshanba kuni ham davom ettiriladi. Tribuna.Uz dastlab Ye guruhi o‘yinlari anonsini taqdim etadi.

Bayyer – Monako (Toshkent vaqti bilan – 00:45)
Bosh hakam: Gedeminas Majyeyka (Litva)

Bugun ham amalda hech narsani hal qilmaydigan bir qator o‘yinlar bo‘lib o‘tadi. Shunday uchrashuvlardan biri pley-offga chiqqani aniq bo‘lib ulgurgan «Bayyer» va «Monako» to‘qnashuvidir. Fransiyaliklar guruh g‘olibligi masalasini hal qilib bo‘lgan, «Bayyer»ning esa ikkinchi o‘rinni egallashiga hech kim to‘sqinlik qila olmaydi.

Ammo bu uchrashuv qaysidir ma'noda «Bayyer»ga muhim deyish mumkin. Chunki jamoa barcha musobaqalarni qo‘shib hisoblaganda ketma-ket to‘rtta uchrashuvdirki, g‘alaba qozona olmayapti. «Monako» ustidan qozonilgan g‘alaba jamoaga ishonchni qaytarishi mumkin. «Monako» esa chempionlar ligasida masalani hal qilishidan tashqari Fransiya chempionatida ham fantastik ishtirokini davom ettirmoqda. So‘nggi 4ta uchrashuvda jamoa raqiblar darvozasiga 13ta gol kiritdi. Jamoa jami 49ta gol bilan Yevropaning eng sermahsul jamoasi bo‘lib turibdi. Hozircha jamoalarning o‘zaro o‘yinida 3ta g‘alaba va 2 durang qayd qilingan. «Bayyer» biror marta ham «Monako»dan ustun kela olmagan. 

Mezbonlar tarkibida Umar Toprak, Vladlen Yurchenko Jonatan Ta jarohatlaridan qutulib safga qaytishgan. Biroq shunga qaramay, jamoa lazareti yetarli darajada to‘la  turibdi. Admir Mehmedi, Kevin Folland, Kevin Kampl, Karim Belarabiy, Lars Bender kabi yetakchilar uchrashuvni o‘tkazib yuborishi kutilmoqda. «Monako»da esa hozircha faqatgina darvozabon Daniyel Subashichning ishtiroki so‘roq ostida qolmoqda.

Tottenhem – TsSKA (00:45, Match TV)
Bosh hakam: Nikola Ritstsoli (Italiya)

«Uembli»da muvaffaqiyatsiz ishtiroki sabab muddatidan oldin pley-off yo‘llanmasidan mahrum bo‘lgan londonliklar hech bo‘lmasa Yevropa ligasi yo‘llanmasini saqlab qolishi uchun TsSKAga qarshi maydonga chiqadi. Leonid Slutskiy uchun so‘nggi uchrashuvda «armiyachilar» faqat g‘alaba qozongan taqdirdagina yevrokuboklarning bahorgi mavsumiga yo‘llanma olishi mumkin.

Ikkala jamoa ham uchrashuvga chempionatda qozonilgan yirik hisobdagi g‘alabalari bilan kelmoqda. «Tottenhem» «Suonsi» darvozasiga javobsiz beshta gol kiritgan bo‘lsa, TsSKA Slutskiyning Rossiya chempionatidagi so‘nggi uchrashuvida «Ural»ni 4:0 hisobida mag‘lubiyatga uchratdi. Jamoalarning Moskvadagi to‘qnashuvida yagona gol Pochettino jamoasi uchun hozircha Yevropa ligasi yo‘llanmasini taqdim etib turibdi. Jamoalar bundan boshqa o‘zaro o‘yinlarda ishtirok etishmagan.

«Tottenhem» tarkibida Erik Lamela va Vinsent Yanssen jarohati sabab maydonga chiqa olmaydi. Shunga qaramay tarkibda yetarlicha rotatsiya bo‘lishini kutish mumkin. TsSKAda uzoq muddatga diskvalifikatsiya qilingan Yeryomenkoni aytmaganda jangovar tarkib Londonga uchib ketgan.