Turkiyada dollarni liraga almashtirganlarga bepul qabr toshlari va'da qilindi

Turkiyaning Bursa shahrida yashovchi qabr toshlarini tayyorlovchi ustaxona egasi lira kursini barqarorlashtirish uchun valyuta almashtirishga rozi bo‘lgan  buyurtmachilarning qabr toshlarini bepul tayyorlab berishga va'da berdi. The Hurriyet Daily News shu haqida ma'lum qildi. 

Firma rahbari Enes Alanning izohlashicha, u bunday ishga vatanparvarlik hissi yuzasidan, mamlakat prezidenti Rajab Toyyib Erdo‘g‘anni qo‘llab-quvvatlash maqsadida qo‘l urmoqda. 

"2 ming dollarni turk lirasiga almashtirib, chekini bizga taqdim etgan kishilarga 750 liraga baholanuvchi qabr toshini bepul tayyorlab beramiz, - deya va'da berdi Alan. - Biz hattoki mozorga ham toshni o‘zimiz yetkazib beramiz". 

Alanning so‘zlariga ko‘ra, buyurtmachilar uning tashabbusiga ijobiy munosabat bildirishmoqda, zero ular ham mamlakat va uning iqtisodiyotini himoya qilish tarafdoridir. Ba'zi xaridorlar cheklarni keltirishgan, lekin qabr toshini bepul olishdan bosh tortishgan.