O‘zbekiston BMTning Suriyada insoniyatga qarshi jinoyatni surishtirishga oid rezolyutsiyasiga ovoz bermadi

BMT Bosh assambleyasi ko‘pchilik ovoz bilan Suriyadagi harbiy jinoyatlarni isbotlash uchun dalillar yig‘adigan va keyinchalik javobgarlarni aniqlab ularni javobgarlikka tortish maqsadida maxsus mexanizm ishlab chiqish yuzasidan rezolyutsiya qabul qildi.

Ushbu rezolyutsiyani ma'qullab 105 mamlakat ovoz bergan, 15 davlat rezolyutsiyaga qarshi, yana 52 davlat vakillari esa betaraf qolgan. O‘zbekiston bu ovoz berishda ishtirok etmadi.

Yangi tuziladigan organ avval tuzilgan Suriyadagi jinoyatlarni tergov qiluvchi mustaqil komissiya bilan hamkorlik qiladi.

Rezolyutsiya loyihasi Lixtenshteyn tomonidan 58 davlat bilan hamkorlikda tayyorlangan bo‘lib, ular qatorida AQSh, Fransiya, Britaniya, Italiya, Germaniya, Turkiya, Saudiya Arabistoni kabi mamlakatlar bor.