Trampning farmoni xorijlik sportchilarning AQShdagi ishtiroklariga ta'sir qilmaydi

AQSh hukumati mamlakatning Milliy olipiya qo‘mitasiga (MOQ) Donald Trampning oxirgi farmonlari xorijlik sportchilarning AQSh hududida o‘tkaziladigan musobaqalardagi ishtirokiga ta'sir qilmasligini ma'lum qildi. Bu haqda Associated Press axborot agentligi xabar bermoqda. 

Oxirgi kunlarda Tramp immigratsiya siyosatini qat'iylashtiruvchi bir qator farmonlarni imzoladi. Ulardan biriga ko‘ra, Iroq, Eron, Suriya, Sudan, Yaman, Liviya va Somali fuqarolarining AQShga 90 kunga kirishi taqiqlanadi.

Bayonotda aytilishicha, MOQ va hukumat sportchilar va rasmiy shaxslarga AQShdagi xalqaro musobaqalarga "tezroq kirish" dasturini joriy qilish bo‘yicha birgalikda ish boshlagan.

Avvalroq Milliy basketbol uyushmasi AQSh Davlat departamentiga AQShning yangi migratsiya siyosati basketbol ligasi o‘yinchilariga qanday ta'sir qilishini tushuntirib berish iltimosi bilan murojaat qilgandi.