AQSH prezidenti Donald Tramp Vashingtonda qurilishi rejalashtirilayotgan Zafar arkasi harbiy baza vazifasini ham bajarishi mumkinligini bildirdi.
Tramp 20-sentabr kuni Truth Social tarmogʻida eʼlon qilgan bayonotida inshootda koʻp miqdorda dronlarni saqlash va zarurat tugʻilganda ularni tezkorlik bilan ishga tushirish imkoni boʻlishini aytdi.
Prezidentning rejasiga koʻra, majmuada snayperlar joylashtirilishi va ular uchun katta hajmdagi oʻq-dorilar saqlanishi ham mumkin. Tramp bunday obyekt dunyoning boshqa hech bir joyida boʻlmasligini taʼkidladi.
Dastlab mazkur inshoot AQSH poytaxtining yangi turistik diqqatga sazovor joyi sifatida taqdim etilgan edi. Loyihaga koʻra, arkaning tom qismida Vashington manzarasini tomosha qilish uchun kuzatuv maydonchasi barpo etilishi kerak edi.
Biroq Tramp endi obyektda dronlar va snayperlarni joylashtirish rejasini ham ilgari surmoqda. Prezident bu gʻoya harbiylarning iltimosi va milliy xavfsizlik masalalari bilan bogʻliq ekanini aytdi. U rejaning harbiy va texnik tafsilotlarini ochiqlamadi.
Shuningdek, inshoot vazifasining oʻzgarishi yangi ruxsatnomalar olishni talab qiladimi yoki yoʻqmi - hozircha nomaʼlum.
Parijdagi arkadan baland boʻladi
Avvalgi rejalarga koʻra, Vashingtondagi Zafar arkasining balandligi 76 metrdan oshishi kerak. Bu 1836-yilda qurilgan va balandligi qariyb 50 metr boʻlgan Parij Zafar arkasidan ancha baland boʻladi.
Yangi inshoot Kolumbiya federal okrugining chekka qismida, Arlington memorial koʻprigi orqali Linkoln memorialiga olib boruvchi aylanma yoʻl hududida qurilishi rejalashtirilgan.
Tramp avvalroq bu yerda dunyodagi eng katta va eng chiroyli Zafar arkasini barpo etish istagini bildirgan edi.
Loyihaning aniq qiymati va uni moliyalashtirish manbalari hozircha maʼlum emas. AQSH ommaviy axborot vositalari keltirgan dastlabki baholarga koʻra, qurilish 100 million dollardan 250 million dollargacha mablagʻ talab qilishi mumkin.
Inshootni harbiy maqsadlarga moslashtirish esa loyiha qiymatini yanada oshirishi ehtimol qilinmoqda.
