Ukraina Donbassdagi vaziyat keskinlashuvida Rossiyani aybladi

Ukraina TIV Donbassdagi vaziyat keskinlashuvida Rossiyani ayblaydi, deb xabar qilgan vazirlik matbuot xizmati. Rossiya tomoni rasmiy Kiyev va g‘arb mamlakatlarining bu kabi ayblovlarini bir necha marotaba inkor etgan hamda Ukraina ichidagi mojaro tarafdori emasligini ta'kidlagan. 

Avvalroq, tan olinmagan Donetsk xalq respublikasi mudofaa vazirligi ham Donbassda vaziyat keskinlashgani haqida xabar qilgan edi. 30 yanvar kuni 10dan ortiq ukrain harbiylari o‘ldirilgan, 15dan ortig‘i yaralangan. 

Ukraina prezidenti Pyotr Poroshenko ma'muriyatining ma'lum qilishicha, davlat rahbari Avdeyevkadagi vaziyat tufayli Germaniyaga safarini muddatidan avval yakunlagan. 

DXR rahbari Aleksandr Zaxarchenkoning so‘zlariga ko‘ra, Kiyevga Donbassdagi mojaro kuchayishi kerak, shunda AQSh prezidenti Donald Trampga o‘z talablarini ilgari sura oladi. 

Xabarlarga ko‘ra, shu munosabat bilan Ukraina TIV Moskvaga bosim o‘tkazishni so‘rab, xalqaro hamkorlariga murojaat qilgan.