Kun yakunida yaxshi narsalar haqida o‘ylang – bu sizga yordam beradi

Kun davomida har bir kishi turli xil, yoqimli va salbiy voqea-hodisalarga duch keladi. Insonlarning aksariyati esa, aynan kayfiyatni buzgan holatlarni yodda saqlaydi, unutishi qiyin bo‘ladi. Aynan ularni muhokama qiladi, do‘stlari yoki oilasiga so‘zlab beradi. Bu jarayon shunchalik hayot tarzimizga singib ketganki, ba'zan, bu haqda fikr yuritish foydalidek tuyuladi. 

AQShning Florida universiteti Uorrington biznes kolleji boshqaruvi professori Joys Bono hamda Minnesota universitetidagi Karlson menejment kolleji professori Tereza Glomb bu borada boshqacha fikrda. 

Ushbu olimlar o‘tkazgan tadqiqot natijasi aksarimiz kelgan xulosaning aksini ko‘rsatmoqda. Ya'ni, ishda yoki kun mobaynida ro‘y bergan yomon emas, balki yaxshi voqea-hodisalarni doimiy ravishda yodga olib yurish inson salomatligiga foyda beradi. Shu boisdan, xotirangizda salbiy holatlarni o‘ylab yuravermasdan, xayolan bo‘lsa-da, nazdingizda arzimas tuyulgan kichik xursandchilik va ko‘ngilxushliklarni so‘zlab yurishga, muhokama qilishga odatlanish foydadan xoli emas. 

Olimlar shu masalaga oydinlik kiritish maqsadida maxsus tadqiqot o‘tkazishdi. Ko‘ngillilardan kuniga ishdan so‘ng, tadqiqot saytiga kirib, maxsus so‘rovnomani to‘ldirish so‘ralgan. Ular 3 hafta mobaynida kuniga 5-10 daqiqa savollarga javob berish bilan ish kunida yuz bergan 3ta yoqimli voqeani yodga olishgan va nima uchun u yaxshi taassurot qoldirganini izohlashgan. 

Tadqiqotlar yakunlanganidan so‘ng, ruhiy va jismoniy charchoqdan nolish va asabbuzarlik darajasi ko‘p bo‘lmasa-da, sezilarli kamaygani qayd etilgan. Bundan tashqari, ishtirokchilar yoqimli hodisalarga e'tiborini qaratishganida, uyga kelganlarida ish bilan bog‘liq jarayonlarni tezroq unutishgan. 

Shu bilan birga, ushbu tajriba insonlar o‘rtasidagi o‘zaro ijobiy aloqalarni kuchaytiradi, mehnat samaradorligini oshirishga yordam beradi. Xodimning turli ijobiy qobiliyatlari yuzaga chiqishiga ko‘mak beradi. Xursandchilik va o‘z-o‘zidan qoniqish hissi ijodiy yondashuv va kashfiyotchilik iqtidorini kuchaytiradi. 

To‘g‘ri, insonlar ishda yuz bergan ko‘ngilsizliklarni aytmasdan tura olishmaydi. Bu tabiiy hol. Biroq qaysidir ma'noda muvozanatni saqlash uchun ijobiy hodisalarni majburiy ravishda xotirlash yaxshiroqdir. Masalan, yig‘ilish va majlislarda so‘zni tanqiddan emas, so‘nggi vaqtda jamoa erishgan yaxshi natijalarni qayd etishdan boshlash maqsadga muvofiqdir. 

Ammo, bu usulning eng foydali jihati, kun nihoyasida bugun sizni kulishga, xursand bo‘lishga majbur qilgan voqealarni bir bor xotirlash bilan ularning tabiiy quvvatidan yana bahra olasiz. Shunday ekan, ish so‘nggida har doim yaxshi narsalar haqida o‘ylashga harakat qiling!