Shvartsenegger Trampdan AQSh prezidenti lavozimini berishni so‘radi

AQShlik aktyor, Kaliforniya shtatining sobiq gubernatori Arnold Shvartsenegger AQSh prezidenti Donald Trampga o‘rinlar bilan almashishni taklif qildi. Aktyor shu tariqa Trampning tanqidiga javob qaytardi. Jangari filmlar yulduzi videoyozuv ko‘rinishidagi ushbu javobni tvitterda chop etdi.

Avvalroq Tramp milliy ibodat nonushtasida "Yulduz shogird" teleshousida muvaffaqiyatli ishtirok etganini aytgan va Shvartsenegger boshlovchilik qilayotgan shouning yangi mavsumini past reytinglar uchun tanqid qilgandi. 

"Ular katta yulduz, Arnold Shvartseneggerni mening o‘rnimga olishdi va biz hammamiz bundan nima chiqqani bilamiz", deb ta'kidlab o‘tdi Tramp.

Tramp hazillashib, zalda to‘plangan odamlarni "Arnold va uning reytinglari uchun ibodat qilishga" chaqirgan.

Aktyor videoyozuvda Trampga ish o‘rinlari bilan almashishni taklif qilgan.

"Ey, Donald, ajoyib g‘oya bor: nima uchun o‘rin almashib ko‘rmaymiz, sen yana televideniyeda boshlovchilik qilasan, chunki sen reytinglar bo‘yicha mutaxassissan, men esa seni ishingni olaman va odamlar nihoyat yana tinch uxlay oladilar", deb aytgan  Shvartsenegger Trampga murojaat qilib.

Aktyor vakili keyinroq "Arnold prezident Tramp o‘z reytinglarini yaxshilashni boshlashiga ibodat qiladi, chunki bu reytinglar yangi prezident uchun tarixdagi eng yomonlaridir", deb aytilgan bayonotni chop etgan.