New World Payphones kompaniyasi Buyuk Britaniya va London shahri ramzlaridan biri bo‘lib qolgan telefon budkalari yangi dizaynini taqdim etdi. Ular xuddi qizil avtobuslar, Big Ben va Pikadilli maydoni kabi mashhurlikka ega. 90 yillik klassik obraz o‘rniga zamonaviylashtirilgan tashqi shakl kelgan: telefon budkalarida nafaqat yopiluvchi eshikni olib tashlashdi, balki ularning rangi ham o‘zgartirildi.
Yangi budkalarda telefon avtomatdan tashqari, tuman haqida ma'lumotlar bo‘lgan sensorli displey ham bo‘ladi. Bundan tashqari, Wi-Fi'ga kirish nuqtalari ham bor. Shahar ma'muriyati budkalarga xizmat ko‘rsatish uchun mablag‘larni ekranlar ichida joylashtiriladigan raqamli reklamadan topishni rejalashtirmoqda.
Budkalarga egalik qiluvchi New World Payphones kompaniyasi bosh direktori Jastin Kokreynning so‘zlariga ko‘ra, yangi budkalar ko‘chalardan eski aloqa vositalarini olib tashlash hamda ularning o‘rniga daraxt ko‘chatlarini ekish imkonini beradi. Uning qo‘shimcha qilishicha, ishlab chiqilgan loyiha mahalliy ishlab chiqaruvchilarga ham yordam beradi – aynan ular Londonda yangilangan “telefon qutilari”ni tayyorlash bilan shug‘ullanadi.
