Turkiya TIV rahbarining Shveytsariyaga safari ham amalga oshmadi

Turkiya Tashqi ishlar vaziri Mavlud Chovusho‘g‘li 12 mart kuniga belgilangan Shveytsariya safarini noma'lum muddatga qoldirdi. Bu haqda Shveytsariya telegraf agentligi (ATS) Yevropa turk demokratlari ittifoqining Shveytsariyadagi bo‘limi rahbari o‘rinbosari Munir Sarukanga asoslangan holda xabar bergan.

Qayd etilishicha, Sarukan bundan oldinroq SonntagsZeitung nashrining shu haqda tarqatgan xabarini tasdiqlagan. Lekin u ham ushbu tashrifning kechiktirilishi sababiga aniqlik kirita olmagan.

Tsyurix kantoni ham bu ma'lumotni matbuot uchun tasdiqladi. Kanton politsiyasi shefi Mario Ferning ma'lum qilishicha, bu qaror uning "yelkasidan tog‘" ag‘dargan. U ushbu tashrif tufayli Turkiya hukumatidan norozi kishilar tomonidan tartibsizliklar kelib chiqishidan xavotirlanayotgandi.

Ushbu tashrif arafasida katta munozaralar kelib chiqqandi.

Bundan oldinroq turkiyalik vazir Niderlandiya va Turkiya o‘rtasidagi chiqqan siyosiy mojaro markazida qolgandi. Niderlandiya hukumati Turkiya tashqi ishlar vaziri samolyotining qo‘nishiga ruxsat bermaslikka qaror qildi. Chovusho‘g‘li mamlakatda yashovchi turklar oldida Turkiyadagi konstitutsiyaviy islohotga bag‘ishlangan nutq so‘zlashni rejalashtirgandi. Ammo Niderlandiya hukumati bu tartibsizliklarga sabab bo‘lishi mumkin deb hisoblagandi.