Saudiya Arabistoni AQShga uchayotgan samolyotlarga planshetlar olib chiqilishini taqiqladi

Saudiya Arabistoni hukumati AQShga reyslarni amalga oshiruvchi samolyotlarga planshetlar olib chiqilishini taqiqladi. Bu haqda Saudiya yangiliklar agentligi ma'lumot bergan.

Qirollikning fuqarolik aviatsiyasi boshqarmasida ma'lum qilinishicha, bunday taqiqlar Ar Riyoddagi qirol Xolid nomidagi aeroportda, Jiddadagi qirol Abdul Aziz nomidagi aeroportda joriy qilingan. 

Boshqarma AQShga parvozlarni amalga oshiruvchi kompaniyalarga tegishli ogohlantirishlarni yo‘llagan. Saudiya Arabistonidan AQShga yo‘l olgan yo‘lovchilar yonidagi elektron qurilmalarni, planshetlar yoki noutbuklarni topshirishi kerak bo‘ladi. 

Bundan oldinroq Reuters agentligi Amerika hukumati o‘ndan ortiq davlatdan keluvchi samolyotlarning aviayo‘lovchilariga elektron qurilmalar bilan mamlakat hududiga kirishini cheklashni rejalashtirayotgani haqida xabar bergandi. Bunday taqiq mobil telefonlardan katta hajmdagi qurilmalarga taalluqli edi. Agentlikning taxmin qilishicha, bu xavfsizlikni ta'minlash chorasidir. AQSh Milliy xavfsizlik vazirligida hozircha bunday cheklov sababi bo‘yicha izoh berilmagan.