Tramp KXDRning muvaffaqiyatsiz raketa sinovini muhokama qildi

AQSh prezidenti Donald Tramp va vitse-prezident Maykl Pens KXDRning muvaffaqiyatsiz raketa sinovini muhokama qildi. Bu haqda «TASS» xabar bergan.

Vitse-prezidentning so‘zlariga ko‘ra, u Tramp bilan hodisa haqida ma'lum bo‘lishi bilanoq telefon orqali bog‘langan.

Maykl Pens 15 aprel kuni Osiyo-Tinch okeani mintaqasi davlatlari bo‘ylab safarga chiqqan. U hodisa haqida Seulga uchayotgan vaqtida, samolyoti Alyaska shtatining Ankorij shahridan havoga ko‘tarilganida xabar olgan.

Pens bilan birga parvoz qilayotgan jurnalistlar tomonidan xabar qilinishicha, Pens bo‘lib o‘tgan voqealar haqida samolyot Bering dengizi ustida bo‘lgan vaqtda xabar topgan.

15 aprel kuni KXDR mamlakatning sharqiy qirg‘oqlarida raketa sinovini amalga oshirgan va sinovlar muvaffaqiyatsiz yakunlangan.