16:39 / 17.04.2017
14403

«Ochiqlik va oshkoralik yo‘q». O‘quvchi migratsiya agentligi jumboqlari yechilishini so‘ramoqda

«Kun.uz» sayti tahririyatiga o‘quvchidan maktub keldi. «Migratsiya agentligining 1 haftalik spektakli...» sarlavhasi qo‘yilgan ushbu maktub muallifi O‘zbekiston Mehnat vazirligi huzuridagi Tashqi mehnat migratsiyasi masalalari agentligi bilan bog‘liq masalaga yana qaytgan.

Migratsiya agentligi kimdan nimani yashirmoqda?

U saytda migratsiya agentliginining kirdikorlari haqida nashr qilingan maqolalarni e'tirof qilib o‘tgan va bu boradagi o‘z fikrlarini ham bildirgan.

«Men-ku biror joyga ishlashga ketish rejasi yo‘q odamman. Buxoro shahrida ishlab, shu yerda yashayman. Qishloqdan ikki jiyanim qo‘ng‘iroq qilib: «Aka biz Koreyaga ketish uchun registratsiya va imtihondan o‘tishimiz kerak. Bilasiz, qishloqda internet yaxshi ishlamaydi yoki tok o‘chib qolishi mumkin, sizda internet va tok muammo emas», deb menikiga 3-4 kunga kelishdi va shu ish bilan mashg‘ul bo‘lishdi. Kimlardir imtihonga kirdi, yiqildi. Kimlar uchundir esa sayt sahifalari bandligicha qolib ketdi. Ya'ni, imtihonda qatnashib «ajabtovur savollar»ni ko‘rish hammaga ham nasib qilgani yo‘q. Bu 100 ming kishi ijrosidagi spektakl bo‘ldi, o‘zingizga ma'lum. Agentlik firibgarlarni emas hammani chuv tushirishdi.

Shu o‘rinda meni o‘ylantirgan savollar va mulohazalarni solishtib ko‘raylik.
1. Agentlik xodimlari: «Savollarni Koreya tomoni va mutaxassislar ishlab chiqqan», deya bong urdi. Demak, ular bizning maktab va kollejlar uchun mo‘ljallangan darsliklarni o‘qib, shu materiallarni o‘zbek tilida berishni ma'qul ko‘rishdimikan? Yoki antiqa statistik savollarni qidirib yurishganmikan?! 

2. Saytga xakerlar hujumi?! Balki, bo‘lajak xakerlar ilk darsini shu saytdan boshlashgandir!? Ehtimol, savollar to‘plamiga shayton ham aralashgandir? «To‘g‘risi, bizning texnik mahsulotlar eskirib, yaroqsiz holga kelib bo‘lgan» deb ochiqchasiga tan olishsa yaxshi bo‘lardi, balki. 

3. «Ayrim antiqa savollar fotoshop qilib internetga joylashtirilgan». Kechirasiz-u hurmatli agentlik xodimlari, sizlarning ayrim emas ko‘pgina savollaringiz fotoshop qilinmasa ham kulgi ostida qoldi. Migratsiya saytining har bir xabaridagi imloviy xatolari-chi? Ular ham fotoshopmi?

4. Xo‘sh, xorijga omi odamlarni jo‘natishmas ekan, balki donishmand Nazarovning shaxsan o‘zlari testni qanday ishlash kerakligini master-klass usulida ko‘rsatib berar? Bu kabi chalkashlikning (ko‘zbo‘yamachilik) oldini olish uchun matbuot anjumani kabi «izni yo‘qotish» operatsiyasi amalga oshmay qoldi. Chunki, bu «B» rejaga ham kiritilmagan muammo bo‘lib chiqdi.

5. Bu qanday bo‘lgan? 6000 «o‘zga sayyoralik» diyorimizdan topildimi? Yoki saralash qayta tashkil bo‘ladimi kabi mavzuga nuqta qo‘yadigan javob ham berishmadi. Ular to‘fon tinib, osmon ochilishini kutishmoqdami? 

6. Saralash va imtihon savollari qaysi mezonlarga asoslanib tuzilgandi? Qanday standartlar asosida? Operator bilan bog‘lanib bo‘lmaydi yoki jo‘yali javob berishmaydi, ochiqlik va oshkoralik yo‘q.

Muallif sayt tahririyatiga yuzlanadi.

Endi umidvor xalq nima qilsin? Dardiga tabib kim? Mutaxassis sifatida maslahat bering! Bu muammoning yechim kalitini siz kabilar topa olmasa, «Ahmad qachon o‘lganini» biladiganlar bu ishni qilishmaydi. O‘n minglab kishining so‘nggi umidi sizlar, shuni bilgan holda qo‘l siltab ortga qaytmang.

Haqiqat qandayligini, ish tizimi loyqa ekanligini sezib turibsiz. Bu ko‘p yildan beri takrorlanib keladi. Bugun ularni to‘xtatib qolmasangiz, keyingi yili ham shu algortm bilan ishlashadi. Boshqacha bo‘ladi deb hech kim kafolat bera olmaydi. Yuqoridagi jumboqlar biz uchun jahon siyosatidagi o‘yinlardan ham qiziqarli bo‘lib qoldi. Bizga shou kerak emas! Spektaklni ko‘rib bo‘ldigu, oxiri gumon. Qanday xulosa olish kerak? Spektakl rejissyori va  ssenariysi kimlar tomonidan yozilgani haqidagi titrlar chiqishini kutib qolamiz.

Ertaklarning oxiri yaxshilik g‘alabasi bilan tugaydi, ko‘ramiz hayotda ular qanday bo‘lar ekan...

Murodulla

Top