O‘zbekiston prezidenti Shavkat Mirziyoyevning Rossiyaga davlat tashrifi doirasida ko‘plab davlatlararo va hukumatlararo bitim va shartnomalar imzolangandi. Ularning biri «O‘zbekiston Respublikasi Hukumati bilan Rossiya Federatsiyasi Hukumati o‘rtasida Rossiya Federatsiyasi hududida vaqtinchalik mehnat faoliyatini amalga oshirish uchun O‘zbekiston Respublikasi fuqarolarini tashkiliy jalb etish va ishga qabul qilish to‘g‘risida» Bitimdir. Tashqi mehnat migratsiyasi masalalari agentligi ushbu bitim bo‘yicha tomonlarning huquq va majburiyatlarini tavsif qildi.
Mehnat muhojirlari Rossiyaga borishdan oldin ish va yotoqxona bilan ta'minlanadi
O‘zbekiston Respublikasi va Rossiya Federatsiyasi hukumatlari mazkur Bitmni imzolar ekan, O‘zbekiston Respublikasi bilan Rossiya Federatsiyasi o‘rtasida davlatlararo munosabatlarning asoslari, do‘stlik va hamkorlik to‘g‘risida 1992 yil 30 maydagi Shartnoma, O‘zbekiston Respublikasi bilan Rossiya Federatsiyasi o‘rtasida strategik sherikchilik to‘g‘risida 2004 yil 16 iyundagi Shartnoma, hamda Mustaqil Davlatlar Hamdo‘stligi doirasida 1994 yil 15 aprelda imzolangan mehnatkash-muhojirlarni ijtimoiy himoya qilish va mehnat migratsiyasi sohasida hamkorlik to‘g‘risida Bitim, O‘zbekiston Respublikasi Hukumati bilan Rossiya Federatsiyasi Hukumati o‘rtasida O‘zbekiston Respublikasining Rossiya Federatsiyasidagi mehnatkash-migrantlari-fuqarolarining va Rossiya Federatsiyasining O‘zbekiston Respublikasidagi mehnatkash-migrantlari-fuqarolarining mehnat faoliyati va huquqlarini himoya qilish to‘g‘risida 2007 yil 4 iyuldagi Bitimga asoslandilar.
«Sir emas, anchadan buyon ishchi kuchi harakatlanishi jarayonlarini tartibga solish va huquqiy tartibga solishni yanada takomillashtirish zaruriyati mavjud edi. Rossiya Federatsiyasi hududida vaqtinchalik mehnat faoliyatini amalga oshirayotgan mehnatkash-muhojirlarning huquq va qonuniy manfaatlari himoya qilinishi zarur edi.
Bitim Rossiya Federatsiyasi hududida vaqtinchalik mehnat faoliyatini amalga oshirish uchun O‘zbekiston Respublikasi fuqarolarini tashkiliy jalb etish va ishga qabul qilish bo‘yicha Tomonlar hamkorligining tartibi va shartlarini belgilab beradi.
Bitimni amalga oshirish uchun mas'ul vakolatli organlar quyidagilardan iborat: O‘zbekiston Respublikasi uchun – O‘zbekiston Respublikasi Mehnat vazirligi; O‘zbekiston Respublikasi Mehnat vazirligi huzuridagi Tashqi mehnat migratsiyasi masalalari agentligi (keyingi o‘rinlarda Agentlik); O‘zbekiston Respublikasi Sog‘liqni saqlash vazirligi; O‘zbekiston Respublikasi Tashqi ishlar vazirligi; O‘zbekiston Respublikasi Ichki ishlar vazirligi, Rossiya Federatsiyasi uchun – Rossiya Federatsiyasi Ichki ishlar vazirligi; Rossiya Federatsiyasi Mehnat va ijtimoiy himoya vazirligi; Mehnat va bandlik bo‘yicha Federal xizmat; Rossiya Federatsiyasi Tashqi ishlar vazirligi Rossiya Federatsiyasi Ta'lim va fan vazirligi; Rossiya Federatsiyasi Sog‘liqni saqlash vazirligi.
