"Dunyodagi eng og‘ir vaznli ayol"ning opasi shifokorlarni yolg‘on gapirishda aybladi

Dunyodagi eng og‘ir vaznli ayol hisoblangan misrlik Imon Abdul Atiyning opasi Hindistondagi klinika shifokorlari bemor operatsiyadan keyin vazn tashlaganini aytib, yolg‘on gapirishganini ma'lum qildi. Bu haqida BBC xabar berdi.

Ikki oy oldin 500 kilogramm vaznga ega bo‘lgan Imon Abdul Atiy Mumbaydagi Sayfi shifoxonasida murakkab operatsiyani boshdan kechirdi. O‘tgan haftada shifokorlar ayolning 328 kilogramm vazn tashlagani haqida xabar qilishgan edi. 

Dunyodagi eng og‘ir vaznli ayol 140 kilogrammga ozdi

Biroq Shayma Salimning ta'kidlashicha, bu yolg‘on hamda uning singlisi og‘ir ahvolda va ehtimol falajni boshidan o‘tkazgan. 

Shifokorlar bu ayblovlarni rad etishmoqda. 

Gap shundaki, dushanba kuni Shayma Salim ijtimoiy tarmoqlarga qisqa videoni joylashtirdi va unda singlisi hamon na gapira va na qimirlay olmayotgani hamda shifokorlar aytgan darajada ozmaganini aytdi.

Seshanba kuni BBC'ga bergan intervyusida u klinikaga nisbatan ayblovlarini takrorladi.

"U (operatsiyaga boshchilik qilgan shifokor Muzaffala Lakdavala) Imonni na operatsiyadan oldin va na undan keyin o‘lchagani yo‘q. Agar unda vazn tashlaganlikni isbotlovchi video bo‘lsa, ko‘rsatsin", - dedi bemorning opasi.

Shifoxona vakili BBC'ga Imon Abdul Atiyning dushanba kuni takroran o‘lchangani va hozirda uning vazni 172 kilogramm ekanini aytdi. 

Shifokor Lakdavala ayblovlarni rad etmoqda. "Shayma Salim o‘zining g‘ayriinsoniyligi bilan meni ajablantirdi. Nima qilib qo‘yganingizni anglaganingizda faqat Xudo sizga yordam berishi mumkin. Men esa Imonni davolashda va uning haqiga duo qilishda davom etaman", - deb yozadi u Twitter'dagi o‘z sahifasida.