«Diktatorga yo‘q!». Istanbulda birinchi may namoyishlari, politsiya kuch ishlatdi

Turkiyada politsiya Istanbul shahrida birinchi may kuni munosabati bilan ko‘chalarga chiqqan kishilar namoyishini tarqatish uchun ko‘zdan yosh sizdiruvchi gaz qo‘lladi. Bu haqda AFP xabar bergan.

Huquq tartibot organlari xodimlari hukumat taqiqlaganiga qaramasdan namoyish uyushtirgan 200ga yaqin kishini to‘xtatishga uringan.

Namoyishchilar qo‘lida «Birinchi mayga sharaflar bo‘lsin!» va «Diktatorga yo‘q!» so‘zlari bitilgandi.

Hurriyet nashri xabariga ko‘ra, Taqsim maydoniga birinchi may plakatini ilmoqchi bo‘lgan ikki ayol qo‘lga olingan.

24 aprel kuni Turkiya IIV rahbari Sulaymon So‘ylu Taqsim maydonida birinchi may tadbirlari o‘tkazilishi taqiqlanganidan ogohlantirgandi.

Ayni vaqtda hududda politsiyachilar soni oshirilgan, maydon atrofi o‘rab olingan. Yaqin atrofda kishilarni nazorat qilish ishlari kuchaytirilgan.