Uzmobile’ga ishga kiritishni va'da qilib, 1,5 ming dollar olgan firibgar ushlandi

2016 yilning 8 iyul kuni noma'lum shaxs, Yakkasaroy tumani hududida fuqaro Surayyo Bobirovaning (jabrlanuvchining anketa ma'lumotlari o‘zgartirilgan) ishonchiga kirib, uni “Uzmobile” uyali aloqa kompaniyasiga ishga joylashtirishni va'da qilib, aldov yo‘li bilan undan 1.500 AQSh dollari miqdoridagi pul mablag‘larini qo‘lga kiritganidan so‘ng, hodisa joyidan yashiringan, deb xabar bermoqda Toshkent shahar Ichki ishlar bosh boshqarmasi. 

Mazkur holat yuzasidan Yakkasaroy tumani IIB huzuridagi Tergov bo‘limi tomonidan O‘zbekiston Respublikasi JKning 168-moddasi 1-qismi (firibgarlik, ya'ni o‘zganing mulkini aldash va ishonchni suiiste'mol qilish yo‘li bilan qo‘lga kiritish) alomatlari bilan jinoyat ishi qo‘zg‘atilgan edi. 

Toshkent shahar IIBB xodimlari tomonidan olib borilgan tergov-tezkor tadbirlari natijasida, mazkur jinoyat muqaddam firibgarlik bilan bir necha marotaba sudlangan, 1981 yilda tug‘ilgan Abduhamid Abduvaxitovich Abdullayev tomonidan sodir etilganligi aniqlangan. 

Abdullayevga nisbatan qamoqqa olish tarzidagi ehtiyot chorasi qo‘llanilgan. Hozirda dastlabki tergov harakatlari davom ettirilib, uning boshqa jinoyatlarga aloqadorligi tekshirilmoqda. 

Yuqoridagi shaxsning xatti-harakatidan jabr ko‘rganlar bo‘lsa, “102” telefon raqamiga yoki yaqin atrofdagi ichki ishlar idoralariga murojaat etishlari mumkin.