MAK Savitskiy nomidagi muzey eksponatlarini Moskvadan Nukusga qayta olib keldi

Joriy yilning 9, 11, 14 iyun kunlari “O‘zbekiston havo yo‘llari” milliy aviakompaniyasi Moskva-Nukus yo‘nalishi bo‘yicha I.Savitskiy nomidagi Davlat san'at muzeyi eksponatlarini qayta olib kelish bo‘yicha maxsus reyslarni amalga oshirdi.

Joriy yilning 7 aprel-30 may kunlari A.Pushkin nomidagi tasviriy san'at Davlat muzeyida Qoraqalpog‘iston Respublikasi Davlat san'at muzeyi kolleksiyasidagi 250 dan ortiq tasviriy va amaliy san'at namunalari, arxeologik buyumlar ko‘rgazmasi bo‘lib o‘tdi. Ushbu ko‘rgazma eksponatlari Nukusdan Moskvaga va teskari yo‘nalish bo‘ylab “O‘zbekiston havo yo‘llari” MAK reyslari orqali olib borildi.

Milliy aviatashuvchining umid bildirishicha, bunday tadbirlar O‘zbekiston madaniy yodgorliklariga qiziqishning ortishiga olib keladi. Bundan tashqari, aviakompaniya O‘zbekiston va Rossiya o‘rtasidagi madaniy aloqalarni yanada mustahkamlashga hissa qo‘shishdan mamnun.