Tramp Iroq bosh vazirini Mo‘sulning ozod etilishi bilan tabrikladi

AQSh prezidenti Donald Tramp Iroq bosh vaziri Haydar al-Obodiyni Mo‘sulning IShID jangarilaridan ozod etilgani bilan tabrikladi hamda birgalikdagi sa'y-harakatlar bilan jangarilarning ozod etilgan hududlarga qaytmasliklarining oldini olish kerakligini aytdi. Bu haqda Oq uyning ikki yetakchi o‘rtasidagi telefon muloqoti natijalariga bag‘ishlangan bayonotida aytilgan.

"Prezident Tramp Iroq bosh vazirini Mo‘sulning Iroq xavfsizlik kuchlari tomondan ozod etilgani bilan tabrikladi, bu esa IShIDga qarshi muhim bosqich bo‘ldi. Prezident iroqlik va amerikalik askarlarning jasoratini qayd qilib o‘tdi va IShIDni to‘liq yakson qilish bo‘yicha o‘z majburiyatlarini ta'kidlab o‘tdi", deyilgan bayonotda.

10 iyulda al-Obodiy Mo‘sulda IShID ustidan yakuniy g‘alabaga erishilganini rasman e'lon qilgandi. Uch yildan ko‘proq vaqt davomida jangarilar tomondan ushlab turilgan shaharning ozod etilishi bo‘yicha kampaniya o‘tgan yil oktabrida boshlangandi. 

Operatsiyada Iroq armiyasi maxsus kuchlari, federal politsiyasi, tezkor javob berish kuchlari ishtirok etgan. Ularni AQSh boshchiligidagi aksilterrorchilik koalitsiyasi havodan qo‘llab-quvvatlab turgan.