XDP rahbarlaridan biri: “Odamlarni qiynab kelayotgan muammolarni bilmagan edik, desak yolg‘on bo‘ladi"

O‘zbekiston XDP Markaziy Kengashi raisi o‘rinbosari Ulug‘bek Vafoyevning ma'lum qilishicha, Prezident Shavkat Mirziyoyevning turli soha vakillari  bilan o‘tkazayotgan uchrashuvlari, aniq belgilab berayotgan vazifalari  nafaqat o‘sha sohalarga, balki butun jamiyat hayotiga tub o‘zgarishlarni olib kirmoqda. 

“Har birimiz eskicha dunyoqarash va ish uslublaridan butunlay voz kechish vaqti kelgani, mamlakatimiz taraqqiyotida butunlay yangi davr boshlanganini tushunib, his qilishimiz lozimligini ko‘rsatmoqda. Shu ma'noda Prezident Shavkat Mirziyoyevning Oliy Majlis palatalari, siyosiy partiyalar hamda O‘zbekiston Ekologik harakati vakillari bilan videoselektor yig‘ilishi ham tarixiy uchrashuvlardan biri bo‘ldi.

Qanchalik achchiq bo‘lmasin, tan olishimiz kerak, siyosiy partiyalar va deputatlar faoliyati bo‘yicha bildirilgan barcha tanqidiy fikrlar — ayni haqiqat!

Ushbu kamchiliklarning sababi nimada? Ularni bartaraf etish uchun nima qilishimiz kerak? Har qanday balandparvoz gaplardan oldin mana shu savollarga javob topishimiz lozim.

Partiyamiz a'zolari va faollari, deputatlarimizni hisobga olsak, yarim millionga yaqin, katta potensialga ega kuchmiz. Lekin, ochiq aytish kerak, bu kuch samarasiz ishlab kelmoqda edi. Buning eng asosiy sababi partiya tashkilotlari, deputatlik birlashmalari rahbarlarining tushunchasi, tashabbuskorligi bilan bog‘liq, desak, to‘g‘ri bo‘ladi.

Yillar davomida tashabbus qilishdan qo‘rqish, tepadan ruxsat kutib o‘tirish, katta-kichik rahbarlarning qosh-qovog‘iga qarash kabi illatlarga o‘rganib qoldik. Natijada siyosiy jarayonlarning boshida turishi kerak bo‘lgan partiyalar, siyosiy maydondagi zaif bo‘g‘inga aylanib qoldi”, - degan Vafoyev.

Uning so‘zlariga ko‘ra, yig‘ilishda bildirilgan tanqidlar, hayotiy takliflar deputatlarni ushbu illatlardan xalos bo‘lishga,  ruhiyatlarini ko‘tarishga, mas'uliyatni oshirishga, jur'atli bo‘lishga da'vat etgan. 

“Muloqotda nafaqat tanqidiy fikrlarni eshitdik, balki undan katta kuch oldik. Saylovoldi dasturimizda joylardagi haqiqiy holat hamda odamlarni qiynayotgan masalalar o‘z aksini topmagan. Xo‘sh, hayotimizdagi odamlarni qiynab kelayotgan muammolarni bilmasmidik? Bilmagan edik, desak yolg‘on bo‘ladi, albatta, bilardik. Lekin haqiqiy holatni dasturimizga ochiq yozishga, muammolarni ko‘ndalang qo‘yishga bizda siyosiy jur'at yetishmagan.  Muammolarni silliqlab, sayqal berib, nomiga yozishga harakat qilganmiz. Natijada dasturimiz joylardagi haqiqiy holatdan va odamlarni qiynayotgan masalalardan yiroq hamda oddiy saylovchilarga tushunarsiz bo‘lib qolgan. Buning oqibatida jamiyatda ta'sir kuchimiz qanday darajadaligi hammamizga ma'lum”, - deydi Vafoyev.

Albatta, partiya dasturi qotib qolgan hujjat emas. Jamiyatdagi islohotlarga hamda elektorat talablariga mos ravishda dasturiy vazifalarni qayta ko‘rib chiqish kerak. Prezident ma'ruzasida ta'kidlanganidek, O‘zbekiston XDP o‘z saylovoldi dasturida aholi ijtimoiy himoyaga muhtoj qatlamlarining (pensionerlar, nogironlar) manfaatlarini himoya qilishni maqsad qilib qo‘ygan. Lekin ularning manfaatlarini himoya qilish yo‘nalishida partiya tomonidan birorta ham qonun tashabbusi yoki parlament nazorati bo‘yicha tashabbus bo‘lgani yo‘q. 

“Tan olish kerak, partiyamizning saylovoldi dasturidan o‘rin olgan masalalarning aksariyati davlat rahbari tashabbusi bilan kiritilayotgan qonun hujjatlari orqali o‘z yechimini topmoqda. Fraksiyamiz mazkur hujjatlarni qo‘llab-quvvatlash va ayrim takliflarni bildirish bilan cheklanib qolmoqda.

Dolzarb ijtimoiy masalalarni atroflicha o‘rganib, sessiyalar muhokamasiga olib chiqish borasida mahalliy Kengashlar deputatlarining faoliyati ham talabga javob bermaydi. Chunki partiya tashkilotlarimiz tomonidan ularga amaliy yordam ko‘rsatilmay kelayotgandi. Faoliyatimizdagi ushbu kamchiliklarni bartaraf etish uchun partiyamizning tashkiliy strukturasini tubdan qayta ko‘rib chiqyapmiz.

Mahalliy Kengashlardagi deputatlarimiz faolligini oshirish, elektorat vakillari bilan yaqin muloqot o‘rnatish, ularning muammolarini chuqur o‘rganish va hal etish bo‘yicha samarali mexanizm yaratishga harakat qilmoqdamiz. Ushbu maqsadlarda partiyamiz Markaziy Kengashida alohida bo‘lim tashkil qilinib, rais o‘rinbosari lavozimi joriy etildi.

Partiyamiz saylovoldi dasturi asosida elektoratimizni bezovta qilayotgan muammoli masalalar yechimiga qaratilgan takliflar bilan chiqish yuzasidan fraksiyaning tashabbuskorligini kuchaytirish choralari ham ko‘riladi.

Muloqotda bildirilgan tanqidiy fikrlar, takliflardan har bir siyosiy partiya, har bir deputat manfaatdor. Shuning uchun o‘zimizga ko‘p xulosalar chiqarib oldik. 

Eng asosiy xulosa – fidoiy bo‘lib ishlash kerak! «Fidoying bo‘lgaymiz seni, O‘zbekiston!», degan so‘zlarni yuragimizga jo qilib ishlashimiz kerak!”, - XDP Markaziy Kengashi raisi o‘rinbosari.