AQSh Suriya hukumatiga kimyoviy qurol qo‘llanilishi yuzasidan maxsus bayonot bilan chiqdi

AQSh davlat departamenti Suriya poytaxti Damashq yaqinidagi Sharqiy Guteda kimyoviy hujum amalga oshirilganiga to‘rt yil to‘lishi munosabati bilan bayonot berdi. Vashingtonning fikricha, o‘sha hujumga Suriya hukumati aybdor.

AQSh ma'muriyatining bildirishicha, 2013 yilda ushbu hodisalar natijasida 1400 dan ortiq kishi halok bo‘lgan.

«Suriya prezidenti Bashar Asadning rejimi kimyoviy qurol qo‘llashni to‘xtatishi, o‘zining kimyoviy qurol zaxiralarini ro‘yxatdan o‘tkazishi va kimyoviy qurolni taqiqlash tashkiloti bilan hamkorlik qilishi lozim», - deyiladi xabarda.

Davlat departamentidan ta'kidlashlaricha, Damashq kimyoviy qurolning qo‘llanilishiga doir xalqaro huquq, normalar va standartlarga rioya etmasa, tegishli javob choralariga uchraydi.

Avvalroq Suriya AQSh va Britaniyani terrorchilarga zaharli moddalarni yetkazib berishda ayblagandi.