BMT: Nigeriyada yil boshidan 80 dan ko‘proq boladan xudkush sifatida foydalanilgan

Nigeriyada jangarilar tomonidan xudkush sifatida hujumlarni sodir etish uchun 80 dan ko‘proq boladan foydalanilgan. Bu haqda jurnalistlarga BMT bosh kotibining rasmiy vakili Stefan Dyujarrik ma'lum qildi. 

U YUNISEFning ma'lumotlarini keltirib o‘tdi. Ularga ko‘ra, joriy yil boshidan beri teraktlar amalga oshirgan bolalar soni o‘tgan yilning shu davriga nisbatan 4 marta ko‘proqni tashkil qilmoqda.

“2017 yil boshidan 83 bola, jumladan 55 qiz portlashlarni sodir etishda qo‘llangan. Ulardan ko‘pchiligi hali 15 yoshga ham to‘lmagan bo‘lgan”, deb aytgan Dyujarrik. 

Uning ta'kidlashicha, “Boko harom” radikal guruhi bu teraktlar uchun javobgarlikni har doim ham o‘z zimmasiga olmagan.

IShIDga sodiqlikka qasamyod keltirgan ushbu guruh va Nigeriya armiyasi o‘rtasidagi qarama-qarshilik 8 yildan beri davom etmoqda. Bu vaqt ichida 2 mln dan ko‘proq odam o‘z uyini tark etgan, deyarli 7 mln kishi gumanitar yordamga ehtiyoj sezadi.

Nigeriyada oxirgi yirik terakt mamlakatning shimoli-sharqida 15 avgustda sodir etildi. Hujum xudkush qizlar qo‘llangan holda amalga oshirilgan, ular tanalariga mahkamlangan portlovchi qurilmani Mayduguridagi bozor va qochqinlar lageri yaqinida portlatganlar. Buning oqibatida 30 kishi halok bo‘lgandi, 80 dan ko‘proq kishi yaralangandi.