“Ijtimoiy fikr”: 96,3 foiz fuqarolarni mamlakatda so‘z va fikr erkinligi kafolatlari qoniqtiradi

97,9 foiz respondent o‘zini qonun himoyasida, deb biladi. Barcha yoshdagi fuqarolarimiz shaxsiy xavfsizligi ta'minlanganidan, ko‘cha-ko‘yda, jamoat joylarida ilg‘or texnologiyalarni, videokuzatuv tizimini joriy qilish orqali osoyishtalikni, tartibotni ta'minlash choralari ko‘rilayotganidan qoniqadi.

84,4 foiz qatnashchilar fikricha, jamiyatimizda qonun ustuvorligi tamoyilining mustahkamlangani g‘oyatda muhim ahamiyat kasb etadi. Inson huquq va erkinliklarini ta'minlash darajasi ham e'tirofga loyiq. Davlatimiz rahbari Shavkat Mirziyoyevning ­tashabbusiga ko‘ra, xalq bilan muloqotning yangi tizimi shakllangani natijasida turli sohalardagi dolzarb muammolar ijti­moiy adolat va qonun talablariga muvofiq hal qilinishiga odamlarimizda ishonch hissi ortgan.

So‘ralganlarning 96,3 foizini mamlakatimizda so‘z va fikr erkinligi kafolatlari qoniqtiradi. Bu ko‘rsatkich o‘tgan yillardagi natijalar bilan taqqoslansa, o‘sish 3,5 foizni tashkil etadi.

Ijtimoiy so‘rovning ko‘rsatishicha, fuqarolarning mutlaq ko‘pchiligi — 96,6 foizi davlatimizning tashqi siyosatini ijobiy baholaydi. Ularning e'tirof etishicha, O‘zbekiston jahon hamjamiyatida o‘z mavqeiga, munosib nufuzga ega. Dunyoning ko‘plab mamlakatlari bilan diplomatik aloqalar o‘rnatilgan. Shu bilan birga, xalqaro tashkilotlarning ishida faol qatnashmoqda, mintaqaviy va xalqaro hamkorlikning mustahkamlanishiga salmoqli ulush qo‘shayapti. Siyosiy, savdo-iqtisodiy, madaniy-gumanitar, ilmiy-texnik sohalarda o‘zaro maqbul aloqalarni faol rivojlantirmoqda.

Farovonlik manbai

So‘rovda 97,4 foiz ishtirokchi mamlakatimiz iqtisodiy rivojidan qoniqishini bildirdi. Har ikkinchi ishtirokchi iqtisodiyotni modernizatsiyalash va uni izchil yuksaltirish jarayonlariga alohida urg‘u berdi. Ta'kidlanganidek, 2017 — 2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasida ko‘zda tutilgan vazifalarning amaliyotga tatbiq qilinayotgani iqtisodiy islohotlarni yangi bosqichga olib chiqdi.  “Urgut”, “Fijduvon”, “Qo‘qon”, “Hazorasp” erkin iqtisodiy ­zonalarining tashkil etilishi, yurtdoshlarimizning fikricha, mamlakat iqtisodiy taraqqiyotini yanada jadallashtirishga, investitsiyalarni jalb qilishga, aholining bandligini oshirishga zamin yaratadi.

So‘rovda mustaqillik yillarida mamlakatimiz iqtisodiyotida erishilgan asosiy natijalar ­bilan bog‘liq savolga 97,9 foiz respondent “bu iqtisodiyot ­tarmoqlarining muvozanatli va samarali rivojlanishi”, deb ­javob berdi.­

Ko‘pchilikning (83,5 foiz) ishonch bildirishicha, mamlakatimiz tashqi iqtisodiy aloqalarni rivojlantirish, milliy iqtisodiyotimizda raqobatdoshlikni oshirish, eksportchi korxonalarni qo‘llab-quvvatlash, fermer xo‘jaliklarining, kichik biznes va xususiy tadbirkorlik sub'yektlarining tashqi bozordagi ishtirokini har tomonlama rag‘batlantirish ishlarida muhim yutuqlarga erishdi. Yurtdoshlarimiz o‘zimizda ishlab chiqarilgan mahsulotlar, jumladan, yengil avtomobillar, qishloq xo‘jaligi, to‘qimachilik, poyabzal va charm mahsulotlari dunyoning ko‘plab mamlakatlariga eksport qilinayotganidan faxrlanadilar.

84,2 foiz ishtirokchining fikricha, yigirma olti yil davomida O‘zbekistonda hayotga tatbiq etilgan iqtisodiy islohotlar kishilarga o‘z salohiyatini keng namoyon qilishi uchun imkon berdi. Aholining turmush darajasi va sifati, oilalar farovonligi yuksaldi. Harakatlar strategiyasi doirasida xususiy mulkni ishonchli himoya qilish chora-tadbirlari aholining iqtisodiy faolligini oshirishiga 90,8 foiz respondentning ishonchi komil. Xususan, O‘zbekiston Respublikasi Prezidenti huzuridagi Tadbirkorlik sub'yektlarining huquqlari va qonuniy manfaatlarini himoya qilish bo‘yicha vakili instituti joriy qilinishi bu yo‘ldagi yana bir dadil qadamdir.

Ertangi kunga ishonch mustahkam

Tadqiqotning har ikkinchi ishtirokchisi o‘tgan davrda o‘zining moddiy ahvoli va turmush shart-sharoitlarini yaxshilab ol­ganini aytdi. Har uchinchi qatnashchi ijtimoiy maqomi oshganidan mamnunligini bildirdi.
22,6 foiz respondent o‘z biznesini ochgan, tadbirkor yoki fermer sifatida faoliyat yuritmoqda. Respondentlarning 13 foizi mamlakatimizdagi, shuningdek, chet ellardagi oliy o‘quv yurtlarida zamonaviy ta'lim olgan. Bulardan ko‘rinadiki, odamlarimizda o‘z hayotini yaxshilash uchun kurashish ko‘nikmasi, shuningdek, jamiyat va davlatning ertangi kuniga ishonchi yuqori darajada.

Yigirma olti yilda O‘zbe­kiston aholini ijtimoiy himoya qilish va turmush sharoitlarini yaxshilash, bandlikni ta'minlash sohasida ham samarali ­siyosat olib bordi. Buni 84,6 foiz respondent e'tirof etgan.

Oila institutini rivojlantirishda jamiyat va davlatning roli ortdi. 95,1 foiz respondentlarning ko‘rsatishicha, jamiyatda ayollarning nufuzi yuksaldi. 95,9 foiz respondentlar keksa avlod vakillariga ko‘rsatilayotgan g‘amxo‘rlikka e'tibor qaratdilar. 86,3 foiz ishtirokchining fikricha, mustaqillik yillarida yurtimiz fuqaro­larining ta'lim olganlik ­darajasi ­sezilarli ravishda o‘sdi. Bu ta'lim tizimidagi ­islohotlarning hayotbaxsh samarasidir.

Umuman, mazkur so‘rov mamlakatimiz aholisida ijtimoiy faollik yuksak ekanini ko‘r­satdi. 81,1 foiz ishtirokchi ­kelajakka, davlatimizning yanada gullab-yashnashiga qat'iy ishonadi.