Samarqandda muz sporti saroyi quriladi va xokkey jamoasi tashkil etiladi

Samarqand viloyatida muz sporti saroyi quriladi va xokkey jamoasi tashkil etiladi. Bu haqda shahar hokimi Furqat Rahimov Samarqand shahrida kam ta'minlangan oilalar, o‘zgalar ko‘magiga muhtoj fuqarolar, chin yetim va nogironlarga turar-joy topshirish marosimidan so‘ng, shahar faollariga tashakkurnoma bildirish chog‘ida ma'lum qildi.

— Quruvchilarimiz Samarqandda yirik muz sporti saroyi qurishni rejalashtirishmoqda. Hozir ushbu saroyni barpo etish uchun yer tanlanmoqda. Balki So‘g‘diyonadagi istirohat bog‘ida tashkil etilar. Muz sporti saroyida qishin-yozin farzandlarimiz konkida uchish, figurali uchish, muz ustida raqs tushish kabi sport turlari bilan shug‘ullanishadi. Shuningdek, Samarqandda xokkey jamoasi ham tashkil etiladi, — dedi Samarqand shahar hokimi Furqat Rahimov.

Eslatib o‘tamiz, 2018 yilda Toshkent shahrining Olmazor va Beshyog‘och ko‘chalari kesishmasida muz sporti saroyi ochilishi haqida ilgari xabar bergan edik.

O‘z muxbirimiz