O‘zbekistonlik yana bir bokschi professional boksga o‘tdi

-60kg.gacha vazn toifasida ringga ko‘tarilib kelayotgan Elnur Abduraimov faoliyatini professional boksda davom ettirishga qaror qildi. Bu haqda bokschining o‘zi KUN.UZ muxbiriga ma'lum qilgan.

Bokschining aytishicha, u ertaga AQShga yo‘l oladi va u yerda professional boksdagi ilk mashg‘ulotlarini olib boradi.

«Amerikaning Devils Fight Slub promouterlik kompaniyasi bilan kelishuvga erishdik. U yerda menga asli rossiyalik bo‘lgan Maks ismli promouter hamrohlik qiladi. U menga Amerikadagi yangi muhitga moslashib olishimga, til bilan bog‘liq muammolarga duch kelmasligimga yordam beradi. Chunki u ruschani biladi va anchadan buyon o‘sha yerda bo‘lib turibdi. Yangi joyga moslashishim qiyin kechmaydi degan umiddaman», deya gapirib o‘tdi Abduraimov.

Osiyo chempioni, jahon chempionati sovrindori bo‘lgan Elnur Abduraimov AQShga tezda ko‘nikib ketishi uchun o‘zbekistonlik bokschilar ham yordam berishini hisobga olganini aytib o‘tdi. Uning aytishicha, hozirda shartnoma tuzmoqchi bo‘lgan promouterlik kompaniyasida o‘zbekistonlik bokschi ham bor.

«Professional boksda beshta jang o‘tkazgan Xurshid Normatov ham (Normatov professional boksning super o‘rta vazn (-69kg) toifasida ringga chiqadi. 5 jang, 5 g‘alaba, 2 nokaut — KUN.UZ izohi) men shartnoma tuzmoqchi bo‘layotgan promouterlik kompaniyasi bilan birga ishlarkan. Shuningdek -56 kg vazn toifasida ringga chiqadigan Murodjon Ahmadaliyev ham shu kompaniya bilan shartnoma tuzmoqchi. Og‘ir vaznda ringga chiqadigan Bahodir Jalolovni ham shu klubga olib kelishmoqchi. Bu albatta menga ham adaptatsiya uchun yordam berishi tayin».

Elnur Abduraimov klubda bu yerda ikki oyga yaqin vaqt davomida mashg‘ulotlarda ishtirok etmoqchi. Shundan so‘ng u professional boksdagi ilk jangini o‘tkazishni rejalashtirgan. Elnur u yerda qaysi murabbiy bilan ishlashini ham oshkor qildi

«Endi birinchi navbatda u yerga borib yangi joyga moslashib, yangicha muhitga moslashib olamiz va mashg‘ulotlarga kirishamiz. U yerda yaqindagina Lomachenkoga qarshi jang qilgan Gilermo Rigondoning (17-1, 11 KO) murabbiyi Pedro Dias menga ustozlik qilishini aytishdi. Shunday tajribali murabbiy qo‘l ostida ikki oycha mashg‘ulotlar o‘tkazib, aprel oyida ilk jangimni o‘tkazishni rejalashtiryapmiz», deya gapirib o‘tdi Abduraimov KUN.UZ muxbiri bilan suhbatda.

Eslatib o‘tamiz, so‘nggi yillarda o‘zbekistonlik bir qator bokschilar, jumladan Fazliddin G‘oibnazarov, Shahram G‘iyosov, Murodjon Ahmadaliyevlar faoliyatini professional boksda davom ettiradigan bo‘lishgandi. Elnur ularning safini to‘ldiradigan bo‘ldi.