09:57 / 21.02.2018
4771

Ispaniya shaharlarida O‘zbekiston sayyohlik salohiyatiga bag‘ishlangan taqdimotlar o‘tkazildi

Ispaniyaning Barselona va Madrid shaharlarida «O‘zbekiston havo yo‘llari» Milliy aviakompaniyasining Toshkent-Barselona-Toshkent yo‘nalishi bo‘yicha muntazam reyslarini yo‘lga qo‘yish va O‘zbekiston sayyohlik salohiyati borasida taqdimot bo‘lib o‘tdi. Bu haqda Milliy aviakompaniya matbuot xizmati xabar bermoqda.

Foto: O‘zbekiston havo yo‘llari matbuot xizmati 

O‘zbekiston Milliy aviakompaniyasi, Kataloniya turizmni rivojlantirish agentligi hamda Toshkentdagi Ispaniyaning viza markazi tadbir ishtirokchilari sifatida ishtirok etishdi. Unda Kataloniya hukumati va ishbilarmon doira vakillari, mahalliy yetakchi sayyohlik kompaniyalari hamda ommaviy axborot vositalari vakillari ham qatnashishdi.

Foto: O‘zbekiston havo yo‘llari matbuot xizmati 

Taqdimot davomida Milliy aviakompaniya imkoniyatlari va O‘zbekistonning madaniy-tarixiy merosi, uning mashhur joylari tasvirlangan videolavhalar namoyish etildi. Milliy aviakompaniya mutaxassislari B2B formatida Ispaniya hukumati va mamlakatning yetakchi sayyohlik kompaniyalari vakillari bilan qator uchrashuvlar o‘tkazdi.

Ikki shaharda o‘tgan tadbir ishtirokchilari O‘zbekistonning sayyohlik salohiyatiga katta qiziqish bildirishdi. Jumladan, O‘zbekistonda amalga oshirilayotgan sayyohlik sohasidagi islohotlarni yuqori baholashdi. Ispaniyalik fuqarolar uchun hozirgi soddalashtirilgan viza rejimi va Barselonaga doimiy parvozlarning yo‘lga qo‘yilishi bu sohani yanada rivojlantirishi alohida qayd etildi.

Foto: O‘zbekiston havo yo‘llari matbuot xizmati 

Ma'lumot o‘rnida: «O‘zbekiston havo yo‘llari» Milliy aviakompaniyasi joriy yilning 24 mayidan boshlab Toshkent-Barselona-Toshkent yo‘nalishi bo‘yicha parvozlarni boshlaydi.

Top