«Ahmadboy»ning advokati: «Og‘irroq jazo berildi» 

Jinoyat ishlari bo‘yicha Toshkent viloyat sudida chinozlik “Ahmadboy” nomi bilan dong chiqargan Ahmadjon Tursunboyevga sud hukmi o‘qilgani xabar berilgandi. Unga 13 yilga ozodlikdan mahrum etish jazosi berilgan, biroq amnistiya qo‘llanib, jazo muddatining to‘rtdan bir qismi qisqartirildi. Unga 1 yil muddatga tadbirkorlik bilan shug‘ullanish huquqidan mahrum qilingan holda 52 million 96 ming so‘mga teng jarima jazosi ham belgilandi.

«O‘zbekiston 24» telekanali efirida namoyish etilgan lavhada aytilishicha, uning himoyachisi sud hukmi ustidan shikoyat qilish tartibi va muddatiga asosan ish ko‘rishini aytib o‘tdi.

«Himoyam ostidagi Ahmadjon Hamidovich Tursunboyevga nisbatan, himoya nuqtai nazaridan qaralganda, juda og‘irroq jazo berildi, deb hisoblayman. Shu sababli ham hukmning nusxasini olganimizdan so‘ng, apellyatsiya shikoyatiga, balki, murojaat qilishimiz mumkin. Jinoyat kodeksining 168-moddasini tan olmadilar. Haqiqatdan ham noqonuniy ishlar bo‘lganini, pushaymon ekanliklarini bildirdilar. Lekin, iloji boricha 168-modda, bundan tashqari, 188-, 189-moddalarini aybdan chiqarishni so‘radilar», - deya aytib o‘tgan uning himoyachisi Malika Mazbudova.

Eslatib o‘tamiz, avvalroq «Ahmadboy» mashmashasiga aloqador yana 6 kishiga jazo tayinlangani xabar berilgandi.