Tinchlik uchun Nobel mukofoti da'vogarlari ro‘yxatiga 329 nomzod kiritildi

2018 yilgi tinchlik uchun Nobel mukofotiga 329 nomzod da'vogarlik qilmoqda. Bu haqda mukofotning topshirilishi uchun mas'ul bo‘lgan Nobel qo‘mitasi saytida ma'lum qilindi.

Qo‘mitada aytilishicha, mukofotga 217 nafar jamoat arbobi va 112 ta tashkilot da'vogarlik qilmoqda. O‘tgan yil mukofotga 318 nomzod, jumladan 215 nafar jismoniy shaxs va 103 ta jamoatchilik va xalqaro tashkilot da'vogarlik qilgan. Nobel jamg‘armasi qoidalariga ko‘ra, nomzodlarning nomlari ma'lum qilinmaydi, chunki bu 50 yil davomida sir saqlanuvchi ma'lumot hisoblanadi.

Nobel qo‘mitasi nomzodlar soni taqdimotidan keyin umumiy ro‘yxat ustida ishlashni davom ettirib, uni qisqartiradi. Natijada kuzga kelib 5-20 ta nomzod qoladi. Mukofot kimga nasib qilishi oktabrda ma'lum bo‘ladi. Qo‘mita aynan o‘shanda Osloda mukofot egalari yoki egasini rasman ma'lum qiladi. Mukofot topshirilishi marosimi dekabrda bo‘lib o‘tadi.

2017 yilda tinchlik uchun Nobel mukofoti yadroviy qurolni taqiqlash bo‘yicha kampaniya ICAN’ga topshirilgandi.