Xorijdagi musodara qilingan mol-mulkni kim boshqaradi?

Prezidentning 27.02.2018 yildagi Xorijdagi davlat mulkidan samarali foydalanishni ta'minlash chora-tadbirlariga doir PQ–3570-son qarori e'lon qilindi.
 
Hujjat bilan Davlat raqobat qo‘mitasi huzuridagi «Davlat aktivlarini boshqarish markazi» DUKga mamlakatimiz sudlarining qarorlari bilan davlat foydasiga o‘tkazilgan yoki ixtiyoriy ravishda respublika mulkiga topshirilgan xorijdagi mol-mulk mulkdorlarining huquqlarini O‘zbekiston nomidan amalga oshirish vakolati berildi, deb yozadi Norma.uz.
 
Eslatib o‘tamiz, JPKning 211-moddasiga muvofiq gumon qilinuvchiga, ayblanuvchiga, sudlanuvchiga, mahkumga tegishli bo‘lgan jinoyat qurollari, shuningdek jinoiy yo‘l bilan orttirilgan pullar va boshqa boyliklar davlat foydasiga o‘tkaziladi. 
 
Agar mol-mulk jinoyat quroli bo‘lmasa va jinoiy yo‘llar bilan orttirilmagan bo‘lsa, musodara qilish jazo chorasi sifatida qo‘llanilmaydi. 
 
Markazga Adliya vazirligi va Oliy sud bilan birgalikda O‘zbekiston sudlarining mol-mulkni davlat foydasiga o‘tkazish haqidagi hukmlarini xorijiy davlatlarning vakolatli organlariga yuborish topshirildi. Bu bilan hukmlarning ijrosi ta'minlanadi.
 
Hukm ijro qilingandan keyin Davlat raqobat qo‘mitasi, TIV, Moliya vazirligi va Bosh prokuratura tomonidan davlat foydasiga o‘tkazilgan mol-mulkning O‘zbekiston mulki deb xatlovdan o‘tkazilishi va rasmiylashtirilishi ta'minlanadi.
 
Keyin Vazirlar Mahkamasi aktivlarning keyingi holati haqidagi qarorni qabul qiladi. Ular sotilishi, O‘zbekiston davlat organlariga o‘tkazilishi, ijaraga berilishi yoki ishonchli boshqaruvga o‘tkazilishi mumkin.
 
Qaror qabul qilingunga qadar Markaz quyidagilarga haqli:

• mazkur mol-mulkni muassasalarimiz joylashgan davlat bilan kelishgan holda ushbu muassasalar ehtiyojlari uchun, shuningdek boshqa davlat organlarining xorijdagi vakolatxonalari ehtiyojlari  uchun o‘tkazish;
• 27.02.2018 yildagi PQ-3570-son qaror matnini xorijiy davlatlarning vakolatli organlariga taqdim etish;
• mol-mulkni ijaraga va ishonchli boshqaruvga berish;
• chet elda bank hisobraqamlarini mustaqil tasarruf etish sharti bilan ochish;
• to‘g‘ridan-to‘g‘ri shartnomalar bo‘yicha mustaqil ekspertlarni, auditorlik, advokatlik, konsalting firmalarini, sug‘urta kompaniyalarini, xizmatlar ko‘rsatuvchi kompaniyalarni va boshqa tashkilotlarni, shu jumladan mol-mulkni boshqarish uchun kerakli xorijiy tashkilotlarni jalb etish.
 
Hujjat 28.02.2018 yildan kuchga kirdi.